काठमाडौं । बेलायतका प्रसिद्ध प्लास्टिक रिकन्स्ट्रक्टिभ सर्जन चार्ल्स एन्दुकाले गायक जस्टिन बिबर चाँडो निको हुने संकेत देखिएको बताएका छन् ।

“मैले भिडियोमार्फत जस्टिनले रिकभरीको सुरुवाती लक्षण देखाएको देखिरहेको छु । यो सिन्द्रोम भएका बिरामीहरूले आफ्नो आँखा झिम्काउन नपाउने र हाँस्न नपाउने लक्षण सामान्य नै हो । यस्ता बिरामीहरूको नाक र अनुहारको मांसपेशीहरू विस्तारै सुधार हुँदै जान्छ । यसपश्चात् उनीहरू हाँस्न पनि सक्छन् । आशा छ, उपचारले उहाँ पनि चाँडै निको हुनुहुनेछ,” सर्जन चार्ल्सले भने ।

क्यानडाका चर्चित गायक जस्टिनले एक दिनअघि एउटा भिडियो सेयर गर्दै आफू रामसे हन्ट सिन्ड्रोमबाट पीडित भएको खुलासा गरेका थिए । त्यसले जस्टिनको अनुहारको आधा भाग पक्षाघात भएको छ ।

यस्ता बिरामीले तत्काल उपचार पाएमा ७५ प्रतिशत पूर्ण रूपमा निको हुने दाबी पनि सर्जन चार्ल्सले गरेका छन् । यसको उपचारमा स्टेरोइड र एन्टिभाइरल औषधिहरू प्रयोग हुने उनले बताए ।

रामसे हन्टकै कारण गायक जस्टिनको अनुहारको दायाँ भाग पूरै पारालाइसिस भएको छ । सोही कारण उनले वर्ल्ड टुर र कन्सर्टहरू स्थगित गरेका छन् । उनको टोरन्टो, वासिङगटन र भारतमा कन्सर्ट स्थगित भइसकेको छ । नवभारत टाइम्सबाट ।