काठमाडौं‌ । लेखक यात्रीप्रकाश पाण्डेको उपन्यास ‘सइन’ माथि अन्तर्क्रिया कार्यक्रम सम्पन्न भएको छ  । नेपाल प्रज्ञा प्रतिष्ठान कमलादीमा शनिबार आयोजित अन्तर्क्रियामा  ‘सइन’ उपन्यासमाथि छलफल गरिएको हो ।

कार्यक्रमका वक्ता उपन्यासकार नीलम कार्की  ‘निहारिका’ले ले उपन्यासमाथि टिप्पणी गर्दै उपन्यास निकै सशक्त रहेको बताइन् । “विगत दशवर्षे सशस्त्र द्वन्द्वको समयमा सुरक्षाकर्मी र छापामार दुवै पक्षतर्फको पात्रको कथालाई तटस्थ बिन्दुमा बसेर कुनै पक्षको विरोध र समर्थनमा नरही शान्तिको पक्ष र द्वन्द्वको विरुद्धमा  लेखिएको ‘सइन’ उपन्यासमा सुरक्षाकर्र्मी युवक र छापामार युवतीको निकै कष्टप्रद प्रेम रहेको खुब मन पर्‍यो” कार्कीले भनिन्  “भाषा, शैली, शिल्प र भावपक्षमा निकै सबल रहेको ‘सइन’ उपन्यास विगत द्वन्द्वको ऐतिहासिक दस्तावेजको रूपमा आएको र उपन्यासका हरेक हरफहरूले पाठकको मन जित्ने कुरा उल्लेख गर्दै पुस्तक पूरै पढिसक्दा मैले कतै पनि कमजोर पक्ष भेटिनँ ।

त्यस्तै, कार्यक्रमका अर्का वक्ता तथा उपन्यासकार नयनराज पाण्डेले लेखकले सइन उपन्यास लेखेर द्वन्द्वकालीन घटनाको भित्री मर्मलाई निकै मिहिन ढङ्गबाट प्रस्तुत गर्न सफल भएको बताए । उनले निकै मनछुने हरफहरू कथाको सन्दर्भसँग जोडेर प्रस्तुत गर्ने लेखकको लेखकीय शैलीले आफूलाई निकै तानेको र नेपाली उपन्यासका असल पाठकहरूले धेरै लामो समयदेखि खोजिरहेको उपन्यास बनेर ‘सइन’ उपन्यास आएको भन्दै प्रशंसा गरे ।

‘सइन’ का लेखक पाण्डेले आफूले सशस्त्र द्वन्द्वको समयमा सुरक्षाकर्मी र छापामार दुवै पक्षको वास्तविक कथालाई समेटेर शान्तिको पक्ष र द्वन्द्वको विरुद्धमा  लेखिएको बताए । 

उपन्यासलाई सांग्रिला पब्लिकेसनले बजारमा ल्याएको हो ।