काठमाडौं । वेस्ट इन्डिजले नेदरल्यान्ड्स भ्रमणमा सम्पन्न तीन खेलको एकदिवसीय अन्तर्राष्ट्रिय क्रिकेट शृंखला ‘क्लिन स्विप’ गरेको छ । शनिबार राति सम्पन्न तेस्रो खेल वेस्ट इन्डिजले २० रनले जितेपछि शृंखला क्लिन स्विप गरेको हो ।

आम्सटेलभीनस्थित भीआरए क्रिकेट मैदानमा टस जितेर ब्याटिङ गरेको वेस्ट इन्डिजले निर्धारित ५० ओभरमा पाँच विकेट गुमाएर ३०८ रन बनाएको थियो । ३०९ रनको लक्ष्य पछ्याएको नेदरल्यान्ड्सले ४९.५ ओभरमा २८८ रन बनाउँदा सबै विकेट गुमायो ।

जितसँगै वेस्ट इन्डिजले तीन खेलको शृंखला क्लिन स्विप गरेको हो । पहिलो खेलमा वेस्ट इन्डिज सात विकेटले विजयी भएको थियो भने दोस्रो खेल पाँच विकेटले जितेको थियो ।

वेस्ट इन्डिजका लागि काइल मेयर्स र शमार ब्रुक्सले शतक बनाए । मायर्सले १२० रन बनाए भने ब्रुक्स १०१ रनमा अविजित रहे । शाई होपले २४ रन जोडे । क्रुमाह बोन्नर १९ रनमा अविजित रहे ।

नेदरल्यान्ड्सका लोगान भानी वीक, बिबियन किङ्मा, रायन क्लेइन, बास डी लीड र आर्यन दत्तले एक/एक विकेट लिए ।

३०९ रनको लक्ष्य पछ्याएको नेदरल्यान्ड्सका म्याक्स ओ’डोउडले ८९ रन बनाए । बिक्रमाजित सिंहले ५४ रन जोडे । मुसा अहमदले ४२ रन बनाउँदा डी लिडले २५ र स्कट इडवार्ड्सले १८ रनको योगदान गरे । पिटर सिलारले १६ र भान वीकले १५ रन जोडे ।

वेस्ट इन्डिजका शेरमन लेविसले तीन विकेट लिए । अकील होसैन र हेडेन वाल्शले समान दुई विकेट लिए । मायर्सको नाममा एक विकेट रह्यो ।