सुदूरपश्चिम । अछामको पञ्चदेवल विनायक नगरपालिका–४ मा आज एक युवक मृत भेटिएको घटनालाई लिएर गरिएको प्रदर्शनपछि उत्पन्न तनाव सामान्य बन्दै गएको छ ।

यही जेठ १७ गतेदेखि बेपत्ता रहेका भनिएका पञ्चदेवल विनायक नगरपालिका–४ का अन्दाजी १७ वर्षीय विनोद शाही नजिकैको भीरमा आज मृत भेटिएका थिए । निज शाहीको हत्या गरिएको भन्दै स्थानीयवासीले प्रदर्शन गर्दै प्रहरी कार्यालय र प्रहरीको गाडीमा तोडफोड गर्न थालेपछि स्थिति तनावग्रस्त बनेको थियो ।

प्रमुख जिल्ला अधिकारी विश्वराज मरासिनीले प्रदर्शनकारी तोडफोडमा उत्रेपछि उत्पन्न परिस्थितिलाई नियन्त्रणमा लिन प्रहरीले अश्रुग्यास र हवाईफायर समेत गर्नुपरेको बताए । “प्रदर्शनकारीले प्रहरीलाई घटनास्थलसम्म पुग्न नदिएर प्रहरी कार्यालय र गाडीमा तोडफोड गर्न थाले,” मरासिनीले भने, “बेलुका घटनास्थलमा पुगेर शव उठाउन दिइएपछि घटनाको अनुसन्धान थालिएको छ ।”

प्रदर्शनकारीले नगरपालिकाका प्रमुख र वडाध्यक्षले घटना घटाएको आरोप लगाएका छन् । गएको वैशाख ३० गते भएको स्थानीय तह निर्वाचनका दिन सो क्षेत्रमा नेपाली कांग्रेस र नेकपा (एमाले)का कार्यकर्ताबीच विवाद र झै–झगडा भएको थियो । यही जेठ १७ गते पनि सो क्षेत्रमा कांग्रेस र एमाले कार्यकर्ताबीच झगडा भएको थियो । मृतक एमालेनिकटका युवा रहेको जनाइएको छ ।

“एकार्कामा आरोप–प्रत्यारोप गरी घटनालाई राजनीतिक रङ दिन खोजिएको छ,” प्रजिअ मरासिनीले भने, “चुनावका विषयलाई लिएर सो क्षेत्रमा कांग्रेस र एमालेका कार्यकर्ताबीच झगडा भएको थियो । पारिवारिक झगडा पनि रहेको भन्नेछ ।” रासस