![सूर्य नेपाल प्रिमियर गल्फ च्याम्पियनसिप : एमेच्योर वाङचेनलाई अग्रता](https://12khari.top/uploads/posts/Surya Nepal Golf1653318145.jpg)
काठमाडौं । एमेच्योर वाङचेन धोन्डुपले सूर्य नेपाल प्रिमियर गल्फ च्याम्पियनसिपको पहिलो दिन सोमबार अग्रता बनाउन सफल भएका छन् ।
सूर्य नेपाल गल्फ टुर २०२१/२२ को अन्तिम प्रतियोगितामा वाङचेनले सात अन्डर ६७ स्कोर गरेका छन् । वाङचेनले दोस्रो स्थानका खेलाडीलाई तीन स्ट्रोक्सले पछि पारेका हुन् । चार अन्डर ६८ स्कोर गरेका भुवन नगरकोटी, रवि खड्का र निरज तामाङ दोस्रो स्थानमा छन् ।
वाङचेनले बुगीबाट दिनको सुरुआत गरेका थिए । तर, दोस्रो होलमा उनले बर्डी खेले भने तेस्रोमा इगल खेलेका थिए । त्यसपछि लगातार चार होलमा उनले बर्डी खेले । त्यसपछि आठौँ र नवौँमा उनले इभान पार स्कोर गरेका थिए । फ्रन्ट नाइनमा ६ अन्डर ३० स्कोर गरेका थिए । ब्याक नाइनमा वाङचेनले एक अन्डर ३५ स्कोर गरे ।
भुवनले फ्रन्ट नाइन र ब्याक नाइन दुवैमा दुई अन्डर ३४ स्कोर गरेका थिए । रवि र निरज दुवैले फ्रन्ट नाइनमा एक अन्डर ३५ र ब्याक नाइनमा तीन अन्डर ३३ स्कोर गरेका थिए ।
शुक्रबहादुर राई, एमेच्योर सद्भाव आचार्य र महेन्द्र फगामीले तीन अन्डर ६९ स्कोर गरे । रामे मगर र एमेच्योर सुवास तामाङले दुई अन्डर ७० स्कोर गरे । शुक्रले फ्रन्ट नाइनमा एक अन्डर ३५ र ब्याक नाइनमा दुई अन्डर ३४ स्कोर गरेका थिए । एमच्योर सद्भाव र महेन्द्रले फ्रन्ट नाइनमा समान दुई अन्डर ३४ र ब्याक नाइनमा समान एक अन्डर ३५ स्कोर गरेका थिए ।
![Global Ime bank](https://baahrakhari.com/uploads/bigyaapan/30885600.gif)
रामे मगरले फ्रन्ट नाइनमा दुई अन्डर ३४ र ब्याक नाइनमा इभन पार स्कोर गरेका थिए । एमेच्योर सुवासले फ्रन्ट नाइनमा इभन पार स्कोर गरेका थिए भने ब्याक नाइनमा दुई अन्डर ३४ स्कोर गरेका थिए ।
पशुपति शर्मा, दलबहादुर लामा, भुवनकुमार रोका, बलबहादुर राई, पूर्णप्रसाद शर्मा, रामकृष्ण श्रेष्ठ र भारतीय एमेच्योर आरभ डी. शाहले समान एक अन्डर ७१ स्कोर गरे ।
दाजुभाई विष्णुप्रसाद र सूर्यप्रसाद शर्माले समान इभन पार ७२ स्कोर गरे । एमेच्योर विजय श्रेष्ठ, तीर्थ पौडेल, संजोक मोक्तान, राजेन्द्र श्रेष्ठ र प्रदीपकुमार लामाले समान एक ओभर ७३ स्कोर गरेका छन् ।
प्रतियोगितामा ४२ व्यावसायिक र ११ एमेच्योर खेलाडीले प्रतिस्पर्धा गर्नेछन् । दुई चरण गरेर ३६ होलको खेलपछि कट गरिने छ । कटपछि शीर्ष २१ र बराबरी अंक ल्याउने खेलाडीले बाँकी ३६ होलमा फाइनल चरणको प्रतिस्पर्धा गर्नेछन् । शीर्ष २१ सँगै ६ एमेच्योर खेलाडीले पनि फाइनल चरणमा प्रतिस्पर्धा गर्ने छन् ।
प्रतियोगिताका विजेताले दुई लाख ५० हजार रुपैयाँ नगद पुरस्कार जित्ने छन् । दोस्रो हुनेले एक लाख ५५ हजार र तेस्रो हुनेले एक लाख १० हजार रुपैयाँ पुरस्कार जित्ने छन् । चौँथो हुनेले ९५ हजार र पाँचौँ हुनेले ८७ हजार रुपैयाँ पुरस्कार जित्ने छन् । त्यसका साथै शीर्ष २१ मा पर्ने अरू गल्फरले पनि नगद पुरस्कार जित्ने छन् ।