काठमाडौं । सूर्य नेपाल गल्फ टुर २०२१/२२ को अन्तिम प्रतियोगिता सूर्य नेपाल प्रिमियर गल्फ च्याम्पियनसिप यही जेठ ९ गतेदेखि हुने भएको छ ।

गोकर्ण गल्फ क्लबमा हुने प्रतियोगिता जेठ १२ गतेसम्म चल्नेछ । प्रतियोगिता ७२ होलमा खेलाइने नेपाल प्रोफेसनल गल्फर एसोसिएसनका महासचिव दीपक आचार्यले बताए ।

प्रतियोगितामा ४० व्यावसायिक खेलाडीले प्रतिस्पर्धा गर्नेछन् । त्यससँगै १२ एमेच्योर खेलाडीले पनि प्रतिस्पर्धा गर्नेछन् ।

दुई चरण गरेर ३६ होलको खेलपछि कट गरिनेछ । कटपछि शीर्ष २१ र बराबरी अंक ल्याउने खेलाडीले बाँकी ३६ होलमा फाइनल चरणको प्रतिस्पर्धा गर्नेछन् । शीर्ष २१ सँगै ६ एमेच्योर खेलाडीले पनि फाइनल चरणमा प्रतिस्पर्धा गर्नेछन् ।

प्रतियोगिताका विजेताले दुई लाख ५० हजार रुपैयाँ नगद पुरस्कार जित्नेछन् । दोस्रो हुनेले एक लाख ५५ हजार र तेस्रो हुनेले एक लाख १० हजार रुपैयाँ पुरस्कार जित्नेछन् । चौथो हुनेले ९५ हजार र पाँचौँ हुनेले ८७ हजार रुपैयाँ पुरस्कार जित्नेछन् । त्यसका साथै शीर्ष २१ मा पर्ने अरू गल्फरले पनि नगद पुरस्कार जित्नेछन् ।

सूर्य नेपाल प्रिमियर गल्फ च्याम्पियनसिपकै प्रो–एम प्रतियोगिता भने जेठ ८ गते हुनेछ । यो प्रतियोगितामा २० व्यावसायिक गल्फर र ७५ एमेच्योर गल्फरले प्रतिस्पर्धा गर्नेछन् ।