काठमाडौं । नबिल बैंकले नेपालमा लगानी गर्न खोजिरहेका विदेशी लगानीकर्तालाई सहजीकरण तथा प्रवद्र्धनका लागि लगानी बोर्ड नेपालसँग साझेदारी गरेको छ । यस सम्झौताअन्तर्गत बैंकले विदेशी लगानीकर्तालाई वित्तिय सल्लाहकार सेवा प्रदान गर्न, प्रत्यक्ष वैदेशिक लगानी प्रवद्र्धन गर्न र नेपालमा लगानीका अवसरहरू देखाउन विभिन्न प्रवद्र्धनात्मक कार्यक्रमहरूमा सहभागिताका लागि बोर्डसँग सहकार्य गर्नेछ ।

नबिल बैंक पूर्वाधार विकासमा विगत ३७ वर्षदेखि योगदान गर्दै आइरहेको छ । यसै क्रममा पूर्वाधार विकासमा लगानी बोर्डको कार्यालयले विगत १० वर्षदेखी नै निकै सहभागिता र सक्रियता देखाउँदै आएको छ ।

उक्त साझेदारीले विदेशी लगानीकर्ताहरूलाई आकर्षित गरी नेपालको आर्थिक विकासलाई संयुक्त रूपमा प्रवद्र्धन गर्ने र पूर्वाधार परियोजनाहरू, हरित क्षेत्रका अवसरहरू, ऊर्जा क्षेत्रको प्रवद्र्धन तथा यस्तै अन्य पूर्वाधारका कुराहरू विकास गर्न देशमा दिगो स्रोतको खाडललाई पूरा गर्न नबिल बैंक र लगानी बोर्ड नेपालको यो सम्झौताले टेवा पुग्ने बैंकले जनाएको छ ।

बैंकका प्रमुख कार्यकारी अधिकृत अनिल केशरी शाह र लगानी बोर्डका प्रमुख कार्यकारी अधिकृत सुशील भट्टले समझदारीपत्रमा हस्ताक्षर गरेका छन् । विदेशी लगानी भित्र्याउन बैंकको महत्वपूर्ण भूमिका रहेका कारण लगानी बोर्ड नेपालको कार्यालयले पहिलोपटक नबिल बैंकलाई साझेदार बनाएको भट्टले बताए । 

बैंकका अध्यक्ष उपेन्द्र पौडेलले बैंकले दिगो बैंकिङसँगै दिगो देश बनाउन ध्यान दिएको बताए । लगानी बोर्डको औपचारिक वित्तीय सल्लाहकार बैंकको रुपमा सम्झौता गर्न पाउँदा बैंक गौरान्वित भएको प्रमुख कार्यकारी अधिकृत शाहले बताए ।