काठमाडौं । नेपाली अभिनेत्री सुरक्षा पन्त विश्वप्रख्यात फिल्म फेस्टिभल ‘कान्स फिल्म फेस्टिभल’को रेड कार्पेटमा हिँड्ने पहिलो नेपाली कलाकार हुने भएकी छन् । उनी कान्स फिल्म फेस्टिभल २०२२ मा उपस्थित हुनका लागि मंगलबार फ्रान्स जाँदैछिन् ।
 
अभिनेत्री पन्तले अभिनय गरेको अन्तर्राष्ट्रिय चलचित्र ‘द एट माउन्टेन्स’ कान्सको मुख्य प्रतिस्पर्धामा छानिएको हो । उक्त चलचित्र छनोटमा परेपछि उनलाई कान्सबाट फेस्टिभलमा सहभागी हुन निम्तो आएपछि उनी कान्स फिल्म फेस्टिभल जान लागेकी हुन् । 

फ्रान्स जानका लागि त्रिभुवन अन्तराष्ट्रिय विमानस्थलमा रहेकी उनले बाह्रखरीसँग भनिन्, “एक महिना अघि द एट माउन्टेन्सको केही भाग नेपालको मनाङमा छायांकन भएको थियो । त्यहीबेला उनीहरूलाई एउटा नेपाली पात्र पनि चाहिएकोले त्यसमा मैले अभिनय गर्ने मौका पाएँको थिएँ ।”
 
‘द एट माउन्टेन्स’ सोही नामको अवार्ड जित्न सफल उपन्यासमा आधारित चलचित्र हो । यस चलचित्रलाई बेल्जियमका निर्देशकद्वय फिलिक्स भ्यान ग्रोनिगेन र शार्लोट भ्यान्डामेर्शले निर्देशन गरेका हुन् ।
 
अभिनेत्री पन्तका अनुसार उक्त चलचित्रको स्क्रिनिङ बुधबार साँझ हुँदै छ, “हाम्रो चलचत्रिको स्क्रिनिङ भोलि साँझ हुँदै छ । हाम्रो टिमसँग रेड कार्पेटमा जाने अनि फोटोसुटको कार्यक्रम पनि छ ।” 

कान्समा नेपालबाट अरु कालकार तथा फिल्मकर्मीहरु गैसके पनि कान्सबाट अफिसियल निमन्त्रणा आएर रेडकार्पेटमा नै हिड्ने सुरक्षा पहिलो नेपाली कलाकार हुन् ।
 
केही वर्षअघि प्रियंका कार्की पनि कान्समा गएकी थिइन् । तर उनी कान्सको अफिसियल निमन्त्रणामा गएकी थिइनन् ।