लोकतान्त्रिक समाजवादी पार्टी (लोसपा) परित्याग गरी नेकपा (एमाले)मा जाने उद्घोषसमेत गरेका राजेशमान सिंह अन्ततः जनता समाजवादी पार्टी (जसपा) मा फर्किए । २०७४ सालको स्थानीय तहको निर्वाचनमा राष्ट्रिय जनता पार्टी (राजपा) बाट वीरगञ्ज महानगरपालिकाको नगरप्रमुख (मेयर) मा तेस्रो स्थानमा रहेका सिंह यसपटक पहिलो हुने दाउमा छन् । २०५४ सालमा वडा सदस्य बनेका सिंहको गत निर्वाचनमा १२ हजार १६५ मत ल्याएका थिए । सिंह सत्ता गठबन्धनबाट मधेस प्रदेशको एक मात्र महानगरपालिका वीरगञ्जको मेयरका साझा उमेदवार हुन् । जनता समाजवादी पार्टी (जसपा), नेपाली कांग्रेस, नेकपा (एकीकृत समाजवादी) र नेकपा (माओवादी केन्द्र)को समर्थन पाएपछि यसपटक मेयरमा निर्वाचित हुन कसैले रोक्न नसक्ने सिंहको दाबी छ । 
प्रस्तुत छ, सिंहसँग स्थानीय तहको निर्वाचन र उमेदवारीको सन्दर्भमा बाह्रखरीले गरेको कुराकानीको सम्पादित अंश । 

मेयरको टिकट पाएपनि हार्ने संकेत देखिएसँगै लोसपा छोड्नुभयो । एमालेबाट पक्कापक्की भएपछि पत्रकार सम्मेलनमार्फत मधेसी दलको विरोध गरेर एमालेको गुनगान गाएको व्यक्ति आज जसपामा आएर एमालेलाई गाली गर्नुहुन्छ । बिचारमा अडिग नहुने तपाईंलाई जनताले कसरी पत्याउने ?

यदि म लोसपामै भएको भए टिकट मैले नै पाउँथेँ म पूर्ण रूपमा विश्वस्त छु । तर त्यो पार्टी आफै अस्तव्यस्त थियो । पार्टी नै व्यवस्थित नभएपछि वीरगञ्जलाई व्यवस्थित बनाउन सकिँदैन भन्ने सोचका साथ म विकल्पको खोजीमा थिए । नेकपा एमालेमा जाने लगभग पक्कापक्की भइसकेको अवस्थामा मभन्दा पहिलै वीरगञ्ज महानगरपालिकाका तत्कालीन नगरप्रमुख विजय कुमार सरावगी जीलाई पार्टीमा प्रवेश गराइयो त्यो पनि कसैको बिहेमा । जसले वीरगञ्जलाई बर्बाद बनाएको छ, त्यही व्यक्ति गएको पार्टीमा म कसरी जान सक्छु ? जसपाका नेताज्यूहरूसँग कुराकानी भएपछि उहाँहरू पनि विकास र परिर्वन चाहनुहुन्छ, मेरो पनि चाहना त्यही हो । त्यही भएर जसपा रोजेको हुँ । जनताले पत्याउने आधार एउटै छ, त्यो हो वीरगञ्जको विकास । वीरगञ्जको विकास र परिवर्तनका लागि मलाई मात्रै अवसर चाहिएको छ । त्यही अवसरका लागि मैले परिस्थितिअनुसार पार्टी फेरेको सहजै स्वीकार गर्छु । 

अवसरका लागि पार्टी फेर्ने तपाई अवसरवादी कि विकासवादी ?

म के हुँ भन्ने कुरा मैले बताइरहन पर्दैन । म उल्टै तपाईंलाई प्रतिप्रश्न गर्न चाहन्छु, अवसरवादी को हो ? मधेसी जनताको मतबाट पदमा पुगेर भ्रष्टाचार गरेर करोडौँ, अर्बाैँ कुम्ल्याउने व्यक्ति अवसरवादी हो कि ? कुनै पनि पदमा नहुँदा पनि कोरोना महामारीमा हजारौँ गरिब, विपन्न एवं श्रमिकहरूलाई निःशूल्क भोजनको व्यवस्था गर्ने म ? वीरगञ्जवासीको मतबाट जितेर बाहिरका व्यक्तिलाई महानगरपालिकामा जागिर लगाइदिने अवसरवादी कि विभिन्न उद्योग कलकारखानाहरूमा भनेर वीरगञ्जकै जनतालाई रोजगारी लगाइदिने म ? यहाँका सर्वसाधारण जनतादेखि उद्योग व्यवसायीसम्मलाई करको बोझ लादेर जनताको ढाड सेक्ने व्यक्ति अवसरवादी हो कि कर धेरै भयो फिर्ता गर्नुपर्छ भनेर आन्दोलन र विरोध गर्ने म ? त्यही भएर मेरो मात्र एउटै लक्ष्य एउटै चाहना हो, वीरगञ्जको विकास र वीरगञ्जवासीको सहज, सरल र सुखी जीवन । 

मेयरकै टिकट पाउन पार्टी फेर्नुभएको आरोप छ अनि अहिले गठबन्धनकै मेयरको साझा उमेदवार भएपछि त्यो आरोप त सत्य रहेछ भन्ने चर्चा चुलिएको छ । के भन्नुहुन्छ ?

आरोप–प्रत्यारोप, गाली, ताली यो सब कुरा राजनीतिमा सामान्य जस्तै भइसक्यो । अझ राजनीतिमा गैरराजनीतिक व्यक्तिहरूको हालीमुहाली हुँदा पनि समस्या भएको भान मैले गरेको छु । म विकासप्रेमी हो । पद तथा पहुँचमा नहुँदा पनि मैले सामाजिक क्षेत्रमा गरेका कामहरू सबै वीरगञ्जवासीलाई थाहै छ । पदकै लागि पार्टी फेरेको कुरामा कुनै सत्यता छैन । तर पार्टीले मलाई योग्य र सक्षम ठानेर टिकट दिएको छ भने पार्टीको विश्वासलाई मैले पनि पूरा गर्ने आँट गरेको हुँ । म पूर्ण रूपमा विश्वस्त छु गठबन्धनको जित सुनिश्चित छ । 

राजनीतिमा गैरराजनीतिक व्यक्ति भनेर तपाईं भन्नुहुन्छ । अनि तपाईंलाई राजनीतिको आडमा गुण्डागर्दी गर्नुहुन्छ भन्नेहरू पनि कम छैनन् नि ?

विरोध गर्न मेरा अरु कुनै विषय र कमजोरी फेला नपारेपछि बहाना त बनाउनै पर्‍यो नि हैन ? ल तपाईं नै भन्नुहोस्, मैले कसरी गुण्डागर्दी गरेँ ? मैले कोही व्यापारी, पसलेलाई धाकधम्की दिएर चन्दा उठाएको छु कि ? मैले कुनै चेली बेटीलाई बाटोमा हिँड्दा नराम्रो नजरले हेरेको छु कि ? कसैको हत्या गरेको छु कि ? मैले खासमा गुण्डागर्दीको परिभाषा नै बुझेको छैन जस्तो लाग्छ । नत्र भने यो आरोप लगाउनेहरूलाई मैले गुण्डागर्दी गरेको प्रमाण देखाउन चुनौती दिन्छु । यदि केही गरेको रहेछु भने म राजनीतिबाटै सन्यास लिएर जनतालाई अनुहार पनि देखाउने छैन । 

अब विषय बदलौँ, घरदैलोमा सहभागी हुनुहुन्छ । चुनावी प्रचारप्रसारमा व्यस्तता बढेको छ । गठबन्धनका अन्य पार्टीले समर्थन गर्नेमा तपाई विश्वस्त हुनुहुन्छ ?

म एकदम विश्वस्त छु । प्रतिगमनलाई परास्त गर्न पवित्र गठबन्धन भएको छ । गठबन्धनकै निर्णयको सम्मान र समर्थन गर्दै यहाँका सम्पूर्ण नेताहरू एवम् कार्यकर्ताहरू पनि गठबन्धनलाई जिताउन लागिरहनु भएको छ । हामी गठबन्धनका जिल्लाका दलका नेताहरूसँग पनि पटक पटक छलफल गरिरहेका छौँ । उहाँहरू पनि एकदम सकारात्मक हुनुहुन्छ । नेपाली कांग्रेस, नेकपा (एस), नेकपा (माओवादी केन्द्र)का सबै नेताहरू हामीसँगै घरघरमा पुगिरहनु भएको छ । गठबन्धनका अन्य दलले घात गर्नुहुन्छ भनेर म सोच्न पनि सक्तिनँ । 

तपाईं मेयरमा निर्वाचित भएपछि वीरगञ्जवासीले परिवर्तनको आभास गर्न पाउँछन् त ?

शत प्रतिशत पाउनुहुनेछ । म निर्वाचित भएको २४ घण्टाभित्रै परिवर्तनको प्रत्याभुति गराउने छु । ऐतिहासिक सहर वीरगञ्जको परिचय फेरिन्छ । अहिलेको जस्तो फोहोर तथा लामखुट्टेको सहर भन्ने परिचय हराउनेमा म विश्वस्त छु । हामीसँग स्पष्ट भिजन छ वीरगञ्जको विकासका लागि । त्यही अनुसारको टिम पनि छ । हामी टिमवर्कमा विश्वास गर्छाैँ । म निर्वाचित भएपछि सर्वप्रथम वीरगञ्जवासीलाई नै महानगरसहित अन्य क्षेत्रमा प्राथमिकताका साथ रोजगारीको सृजना गर्नेछौँ । सडक फराकिलो पार्नेदेखि नाला निर्माण हुँदै सबैभन्दा ठूलो समस्या अव्यवस्थित सहरीकरणलाई व्यवस्थित गर्नेछौँ । अहिले कोही वीरगञ्ज आउने बित्तिकै हेर्न लायक अनि बस्न लायक छैन । तर अब कोही वीरगञ्ज आउने बित्तिकै आहा कस्तो सफा र सुन्दर महानगर भन्ने बनाउछौँ । ग्रामीण क्षेत्रका बासिन्दालाई हामी गाउँमा छौँ भन्ने आभास गराउने छैनौँ । शिक्षा, स्वास्थ्य, कृषि, रोजगार, युवा, महिला, बालबालिका, उद्योग लगायत हरेक क्षेत्रमा हामीले विशेष योजना बनाएका छौँ । योजनाहरू समावेश गरिएको प्रतिबद्धता पत्र पनि केही दिनमै सार्वजनिक गर्नेछौँ । 

तपाईंका कुरा सुन्दा त साँच्चिकै वीरगञ्जले मुहार फेर्ला भन्ने लाग्यो तर त्यसका लागि स्रोत पनि चाहियो । कसरी व्यवस्थापन गर्नुहुन्छ ?

भनिन्छ, ‘जहाँ इच्छा, त्यहाँ उपाय’ । नियत सही हुनुपर्छ, जसरी पनि गर्न सकिन्छ । अनि अर्काे कुरा पछिल्लो पाँच वर्षमा वीरगञ्ज महानगरमा झण्डै २५ अर्ब रुपैयाँ आएको छ । यो पनि यहाँ संकलन भएको कर बाहेक । के वीरगञ्जवासीले २५ अर्बको विकासको आभास गरे त ? २५ अर्ब त के २५ लाखको पनि विकास भएको छैन । एसियन विकास बैंक (एडीबी) को परियोजना बाहेक वीरगञ्ज महानगरपालिकाले आफै गरेको काम एउटा पनि छैन भन्दा फरक पर्दैन । हामी जे भएपनि उपलब्ध स्रोत साधनको भरपुर प्रयोग गर्दै थोरै स्रोतबाट धेरै उपलब्धि हुने काम गर्नेछौँ । वीरगञ्जलाई आर्थिक राजधानी भनिन्छ । तर यहाँका जनतालाई अहिले पनि के खाउँ के लाउँ भन्ने पिरले नै पिरोलिरहेको छ । यस्तो पनि आर्थिक राजधानी हुन्छ ? हामी यहाँका उद्योगी, व्यवसायीसँग छलफल गरेर ठोस योजनाका साथ औपचारिक रूपमै आर्थिक राजधानी घोषणा गरेर औद्योगिक कोरिडोरको रूपमा विकास गर्नेछौँ ।