किभ । युक्रेनको राजधानी किभमा बिहीबार रुसी फौजले प्रहार गरेको क्षेप्यास्त्रबाट एक युक्रेनी महिला पत्रकारको मृत्यु भएको छ । आक्रमणमा अमेरिकी लगानीमा सञ्चालित युक्रेनको रेडियो लिबर्टीकी ५५ वर्षीया पत्रकार भिरा हिरिचको ज्यान गएको हो । 

रुसले बिहीबार प्रहार गरेको दुईमध्ये एक क्षेप्यास्त्र पत्रकार भिराको घरमा खसेको थियो । उनको शव भग्नावशेषबाट निकालिएको हो । 

रेडियो स्टेसनकाअनुसार उनी हसिलो, दयालु र व्यावसायिक पत्रकार थिइन् । 

'संयुक्त राष्ट संघकाे अपहेलना'

संयुक्त राष्ट्र संघका महासचिव एन्टोनियो गुटरेस युक्रेनी राष्ट्रपति भोलोदिमिर जेलेन्स्कीसँग वार्ताका लागि किभ भ्रमणमा रहेका बेला रुसी क्षेप्यास्त्र आक्रमण भएको हो ।

आक्रमणका बेला किभमा गुटरेस र जेलेन्स्कीबीच बैठक भइरहेको थियो । जेलेन्स्कीले रुसले संयुक्त राष्ट्र संघको अपहेलना गर्ने प्रयास गरेको आरोप लगाएका छन् । 

यसैबीच युक्रेनी अधिकारीहरूले एजोभ्सटल स्टिल कारखानामा फसेका सर्वसाधारणलाई बाहिर निकाल्ने योजना बनाइएको बताएका छन् ।

एक दातृ संस्थाले रुसी सेनाले युक्रेनमा दुईजना बेलायती दातृ कार्यकर्तालाई नियन्त्रणमा लिएको जनाएको छ ।

यसैबीच नेटोका उप महासचिव मिर्सिया गियोनाले युक्रेन युद्ध सकिन वषौँ लाग्न सक्ने बीबीसीलाई बताएका छन् । 

बीबीसीबाट ।