काठमाडौं । दक्षिण एसियाली खेलकुद प्रतियोगितामा स्वर्णपदक जित्न सफल मिनु गुरुङले शनिबार गणेशमान सिंह स्मृति राष्ट्रिय बक्सिङ प्रतियोगिताको क्वार्टरफाइनलमा स्थान बनाएकी छन् । 

वसन्तपुर डबलीमा आयोजित प्रतियोगितामा त्रिभुवन आर्मी क्लबकी मिुनले महिला ५१ किलो तौलसमूहमा मधेस प्रदेशकी रमिशा श्रेष्ठलाई हराउँदै क्वार्टरफाइनलमा स्थान बनाएकी हुन् । सोही स्पर्धामा सशस्त्र प्रहरी बल (एपीएफ)की सन्जुमाया थिङले प्रदेश–१ की सुस्मिता श्रेष्ठलाई हराउँदै क्वार्टरफाइनलमा स्थान पक्का गरिन् । 

वीर गणेशमान सिंह स्पोर्ट्स कमिटीद्वारा आयोजित प्रतियोगिताको महिला ५७ किलो तौलसमूहमा बाग्मती प्रदेशकी स्वस्तिका तिरुवाले कर्णाली प्रदेशकी सुशिला थापालाई हराउँदै अन्तिम आठमा स्थान बनाइन् । सोही तौलसमूहमा प्रदेश–१ की सुस्मिता राईले सुदूरपश्चिम प्रदेशकी सन्जिता चौधरीलाई हराउँदै क्वार्टरफाइनलमा स्थान बनाइन् । 

पुरुष ५२ किलो तौलसमूहमा गण्डकी प्रदेशका आकाश रानाले लुम्बिनी प्रदेशका सुरज ओलीलाई तथा एपीएफका प्रदीप महर्जनले कर्णाली प्रदेशका मोहन गुरुङलाई हराउदै क्वार्टरफाइनलमा स्थान बनाए । पुरुष ५७ किलो तौलसमूहमा नेपाल पुलिस क्लबका शम्भु राजवंशीले सुदूरपश्चिमका रामबहादुर थापालाई  तथा एपीएफका पुरन राईले वाग्मती प्रदेशका मार्सल गुरुङलाई पाखा लगाउदै क्वार्टरफाइनलको यात्रा तय गरे । 

पुरुष ६३ किलो तौलसूहमा एपीएफका सोनाम सार्की र लुम्बिनीका अनिल पुन मगरले क्वार्टरफाइनलमा स्थान सुरक्षित गरे । सोनामले सुदूरपश्चिमका वीरेन्द्र रावललाई तथा अनिलले प्रदेश–१ का तोबिन प्रधानलाई हराएको थिए । पुरुष ६९ किलो तौलसमूहमा एपीएफका विक्रम चौधरीले मधेशका सचिन शाक्यलाई तथा लुम्बिनीका विकास रानामगरले गण्डकीका सुनिल विकलाई हराउँदै क्वार्टरफाइनलमा स्थान पक्का गरे । 

पुरुष ७५ किलो तौलसमूहमा त्रिभुवन आर्मीका दीपेश लामाले लुम्बिनी प्रदेशका गणेश सुनारलाई हराउँदै क्वार्टरफाइनलमा स्थान बनाए । 

त्यसअघि पूर्व उपप्रधानमन्त्री एवं गणेशमान सिंह फाउन्डेसनका अध्यक्ष प्रकाशमान सिंहले प्रतियोगिताको उद्घाटन गरेका थिए । उक्त अवसरमा सिंहले १३औँ दक्षिण एसियाली खेलकुदमा स्वर्णपदक जित्न सफल मिनुसहित भुपेन्द्र थापामगर र सनिल शाहीलाई एक लाख नगदसहित सम्मान गरेका थिए । नेपाल बक्सिङ संघका सदस्य ओमनारायण श्रेष्ठले नगद उपलब्ध गराएका हुन् । 

राष्ट्रिय खेलकुद परिषद्का सदस्यसचिव टंकलाल घिसिङले प्रतियोगिता सफलताका लागि शुभकामना दिदै नवौँ राष्ट्रिय खेलकुदको तयारीमा जुट्न सरोकारवाला सबैलाई अपिल गरे ।

प्रतियोगितामा पुरुषतर्फ ७ र महिलातर्फ ५ गरी १२ स्पर्धामा खेलागी प्रतिस्पर्धा गरेका छन् । सात प्रदेश र तीन विभागीय टोली गरी १० टिमका १०२ खेलाडीले प्रतिस्पर्धा गरेको प्रतियोगिताका संयोजक राजीव श्रेष्ठले बताए ।

प्रत्येक स्पर्धाका विजेताले २५ हजार, उपविजेताले १५ हजार र तेस्रो हुनेले दुई खेलाडीले समान ७ हजार ५०० रुपैयाँ नगद पुरस्कार जित्नेछन् । शनिबार सम्म हुने प्रतियोगिताको उत्कृष्ट पुरुष खेलाडीलाई मोटरसाइकल र उत्कृष्ट महिला खेलाडीलाई स्कुटर पुरस्कार दिइने छ ।

तस्बिरहरू : अभिषेक महर्जन/बाह्रखरी