काठमाडौं । जिल्ला प्रशासन कार्यालय काठमाडौंले फोहोर व्यवस्थापनमा अवरोध गरे कारबाही गर्ने चेतावनी दिएको छ । प्रशासनले आज एक सूचना जारी गर्दै फोहोरमैला व्यवस्थापन अवरोध गरे कानुनबमोजिम कारबाही गर्ने चेतावनी दिएको हो ।

‘‘नेपाल सरकारले आवश्यक सेवा सञ्चालन ऐन २०१४ अनुसार २०७८।०२। १७ गते प्रकाशित राजपत्रको दफा १४ मा फोहोरमैला व्यवस्थापनलाई अत्यावश्यक सेवाभित्र राखि अत्यावश्यक सेवा बन्द, निषेध गरेको र फोहोरमैला व्यवस्थापन ऐन २०६८ को दफा ३८ को उपदफा (ड) र (ढ) बमोजिमको कार्यलाई कसुर गरेको ठहरिने हुनाले सो बमोजिमको क्रियाकलाप गर्ने जोकोहीलाई ऐनको दफा ३९ को ९ बमोजिम सजाय गरिनेछ,” प्रशासनले जारी गरेको सूचनामा भनिएको छ ।

पासाङल्हामु राजमार्ग अन्तर्गत पर्ने तारकेश्वर नगरपालिकाका स्थानीयले मुड्खु तीनपिप्ले सडक कालोपत्रे हुनुपर्ने माग राख्दै सडक अवरोध गर्दै आएका छन् ।

स्थानीयको अवरोधकै कारण काठमाडौंमा दुई सातादेखि १२ हजार मेट्रिक टन बढी फोहोर उठ्न सकेको छैन् । काठमाडौं महानगरपालिका लामो समयदेखि केन्द्रीय र प्रदेश सरकारलाई सडक पिच गरेर उपत्यकाको फोहोर विसर्जनको अवरोध हटाउन आग्रह गर्दै आएको छ ।

प्रशासनले उपत्यकाको फोहोर विसर्जनमा अवरोध नगर्न आग्रह गरेको छ ।