विराटनगर । आसन्न स्थानीय चुनावका लागि विराटनगर महानगरपालिकाको मेयरमा नेकपा एमालले पाँचजनाको नाम सिफारिस गरेको छ ।‌

महानगर कमिटीले वैशाख ३० गते हुने स्थानीय तहको निर्वाचनमा एमालेबाट मेयर पदमा उठ्न चाहेका आकांक्षीको नाम सिफारिस गरेको हो ।‌ 

महानगर कमिटीको शनिबार बसेको बैठकले  उपप्रमुखमा पनि तीनजनाको नाम सिफारिस गरेको छ ।

मेयरमा एमाले विराटनगर अध्यक्ष सागर थापा, केन्द्रीय सदस्य रामलाल साह, जिल्ला उपाध्यक्ष बावुराम कार्की, पशुराम बस्नेत र  नेता महेश भट्टराईको नाम सिफारिस भएको छ । बस्नेत र भट्टराई पार्टीको प्रदेश–१ कमिटी सदस्य हुन् । 

उपप्रमुखमा शिल्पा कार्की, बिमला घिमिरे दाहाल र अन्जु उपाध्यय (शिला)को नाम सिफारिस गरेको पार्टीले जनाएको छ ।

महानगर अध्यक्ष सागर थापाले कुनै एकजनाको नाममा सहमति नजुटेपछि सबैको नाम सिफारिस गरिएको बताए ।‌ महानगरको उमेदवार अब केन्द्रले टुंग्याउने छ । 

विराटनगरको मेयरमा पूर्वमन्त्री लालबावु पण्डित र प्रदेश सामाजिक विकास मन्त्री जीवन घिमिरेको नाम चर्चामा थियो । तर, उनीहरूको नाम सिफारिस भएन । घिमिरेले आफू फेरि प्रदेश सांसद उठ्ने र मुख्यमन्त्रीको जिम्मेवारी सम्हाल्ने तयारीमा रहेकोले महानगरमा मन नगरेको बताए ।