काठमाडौं । नेपाली कांग्रेस काठमाडौं महानगर समितिले हनुमानढोका क्षेत्रको वसन्तपुर डबलीमा कंक्रिट संरचना हटाउन माग गरेको छ ।

काठमाडौं महानगरपालिकाले विश्व सम्पदा सूचीमा सूचीकृत सम्पदामा पुरातत्व विभागको अनुमतिविना नयाँ कंक्रिट संरचना बनाएको भन्दै कांग्रेस काठमाडौं महानगर समितिले उक्त संरचना हटाउन माग गरेको हो ।

सोमबार महानगरका सभापति निलकाजी शाक्य नेतृत्वमा वसन्तपुर डबलीमा विरोध भएको थियो । 

विरोध प्रदर्शनपछि महानगर समितिका उपसभापति सन्तकुमार महर्जनको नेतृत्वमा काठमाडौं महानगरका कार्यकारी निर्देशकलाई निर्माण कार्य रोक्न पत्रसमेत बुझाइएको छ ।

मेयर विद्यासुन्दर शाक्यले रानीपोखरी, कमलपोखरी, बालगोपालेश्वर मन्दिरलगायतका संचरनामा कंक्रिटको प्रयोग गरी प्राचीन स्मारक ऐन २०१३ विपरीत काम गर्दै आएको उनीहरूको भनाइ थियो ।