काठमाडौं । मोहम्मद सालाहले एक गोल गर्नुका साथै अर्कोमा अवसर सिर्जना गरिदिएको खेलमा इजिप्टले आइतबार राति मोरक्कोलाई २–१ ले हराउँदै अफ्रिकन कप अफ नेसन्सको सेमिफाइनलमा स्थान पक्का गरेको छ । 

मोरक्कोले सुरुमै अग्रता लिए पनि जोगाउन नसक्दा प्रतियोगिताको यात्रा क्वार्टरफाइनबाट टुंगिएको छ । सोफिएन बौफलले पेनाल्टीमा गरेको गोलबाट मोरक्कोले सातौं मिनेटमा अग्रता लिएको थियो । आयमन अश्रफले हाकिम जियाचलाई फाउल गरेपछि मोरक्कोले पेनाल्टी अवसर पाएको थियो । उक्त अवसरमा बौफलले गोल गरेका हुन् । 

लिभरपुलका फरवार्ड सालाहले ५३औं मिनेटमा बराबरी गोल फर्काए । निर्धारित ९० मिनेटको समय १–१ को बराबरीमा सकिएपछि खेल थप ३० मिनेट धकेलिएको थियो । थपिएको ३० मिनेट समयको दशौं मिनेटमा मोहम्मद सालाहको पासमा ट्रेजिगुएटले गरेको गोलबाट इजिप्टले अग्रता लियो । एष्टन भिल्लाका फरवार्ड ट्रेजिगुएटले गरेको त्यही गोल इजिप्टलाई सेमिफाइनल पुर्याउन निर्णायक बन्यो । 

सालाहले २०१७ मा अफ्रिकन कप अफ नेसन्समा डेब्यू गरेपछि इजिप्टले गरेको ६४ प्रतिशत गोलमा संलग्न भएका छन् । १४ मध्ये ९ गोलमा सालाह प्रत्यक्ष संलग्न छन् । 

इजिप्टले अब फाइनल प्रवेशका लागि आयोजक क्यामरुनविरुद्ध प्रतिस्पर्धा गर्नेछ । त्यस्तै अर्को सेमिफाइनलमा सडियो मानेको सेनेगलले बुर्किना फासोसँग प्रतिस्पर्धा गर्नेछ । 

सेनेगलले आइतबार राति नै इक्वेटोरियल गिनीलाई ३–१ ले हराउँदै सेमिफाइनलमा स्थान बनाएको हो । सेनेगलले २८औं मिनेटमा फमेरा डिडियुले गरेको गोलबाट अग्रता लिएको थियो । ५७औं मिनेटमा इक्वेटोरियल गिनीका जनिक बुएला सामले बराबरी गोल फर्काए । ६८औं मिनेटमा चेइखोउ कौएटले गरेको गोलबाट सेनेगलले अग्रता लियो । ७९औं मिनेटमा इस्माइला सारले अर्को गोल थपेपछि सेनेगललको सहज जित निकालेको हो ।