काठमाडौं । हुम्लामा भारी हिमपात हुँदा जनजीवन कष्टकर बनेको छ । आइतबार बेलुकादेखि परेको हिमपातले जनजीवन कष्टकर बनेको छ । हवाइ उडान पनि प्रभावित बनेको छ । 

दुई दिनदेखिको हिमपातले करिब तीन फिट हिँउ जमेको सर्केगार्ड गाउँपालिका वडा नम्बर १ का वडाध्यक्ष गोकुल बुढाले जानकारी दिए । ‘‘भारी हिमपातले तापक्रम माइनस ५ देखि ९ डिग्रीमा झरेको छ । एक ठाउँबाट अर्को ठाउँसम्म जान सकिने अवस्था छैन । हिमपातका कारण सीता एयरका दुई जहाज सिमकोट विमानस्थलमै थन्किएका छन्,” उनले भने । 

नाम्खा गाउँपालिका न्यालुलेक नाका बन्द छ । पशुचौपाया चराउन कठिनाइ छ । सिमकोट, नाम्खा, बर्गाउ, बुराउसे लगायतका उच्च हिमाली क्षेत्रमा हिमपात र तल्लो हुम्लामा पानी परिरहेको पनि वडाध्यक्ष बुढाले जानकारी दिए ।