बीबीसी । गलत कारणका लागि चिनियाँ मोडल न्याङन्याङका पुराना तस्बिरहरु यतिबेला भाइरल भएका छन् । 

यसमा उनले ‘सानो चिम्से आँखा छ भन्दैमा म चिनियाँ हुनै अयोग्य हुँ ?’ भन्ने प्रश्न गरेकी छन् । 

मानिसहरुले उनलाई जानीजानी राष्ट्रवाद विपरीत भाव प्रस्तुत गरेको भनेर विभिन्न आरोप लगाउँदै गाली गरेका छन् । वास्तवमा एउटा खानेकुराको ब्रान्डका लागि विज्ञापन गरेकामा उनी यसरी आलोचित भइन् जसमा उनको दोष भनेको केबल चिम्से आँखा हुनु रहेको थियो । 

कतिपय सामाजिक सञ्जाल प्रयोगकर्ताहरुले त उनलाई यति आक्रामक प्रतिक्रिया दिए कि कम्पनीले अन्ततः उनलाई सबै अनलाइन विज्ञापनबाट हटाउनु परेको हो । यसमा उनको रुपले मानिसहरुलाई असहज महसुस गराएको भएमा क्षमा चाहन्छौँ भनेर कम्पनीले माफी समेत माँगेको छ । 

तर उता न्याङ चाहिँ आफूमाथि त्यस किसिमले आक्रमण गर्नलाई आफ्नो वास्तविक गलती नै थाहा नभएको बताउँछिन् । 

उनी भन्छिन्, “मैले केबल मोडलका रुपमा मेरो काम मात्र गरिरहेकी थिएँ । मलाई यो रुप मेरा आमाबुवाले दिनुभएको हो । र मैले यस रुपमा जन्मिएर कसरी चीनको अपमान गरेँ ?”

२०१९ मा खिचिएको सो विज्ञापन चिनियाँ सामाजिक संजाल प्रयोगकर्ताहरुले धेरै मिहिनेतले खोजेर निकालेका हुन् । 

यसअघि नोभेम्बरमा पनि एक चिनियाँ फेशन फोटोग्राफरले फ्रेन्च लक्जरी ब्रान्ड डिओरका लागि चिम्से आँखा भएकी मोडलको तस्बिर खिचेकामा सबैतिरबाट आलोचित हुनु परेको थियो । उनले पनि यसका लागि सार्वजनिक रुपमा माफी माग्नु परेको थियो । 
पछिल्लो समय चिनियाँ सामाजिक संजालमा चिम्से आँखा भएका चिनियाँ महिलाहरुलाई विज्ञापन गर्न राखेकामा घोर विरोध गर्ने चलन व्याप्त बनेको छ । ठुल्ठुला ब्रान्ड जस्तै मर्सिडिज बेन्ज र गुचीले पनि यस्तै प्रकारका आक्रामक प्रतिक्रियाको सामना गर्नुपरेको छ । 

चीनमा बढ्दो पश्चिम विरोधी भाव र अनलाइन राष्ट्रियतालाई लिएर कतिले चाहिँ त्यस प्रकारका विज्ञापन वास्तवमा चिनियाँहरुप्रति भेदभावको उदाहरण भएको बताइरहेका छन् । किनकी पश्चिमी मुलुकले चिम्से आँखालाई नै ठेट चिनियाँ अनुहारका रुपमा हेर्ने गर्दछ र  ब्रान्डहरुले यस्ता मोडललाई राखेर त्यसैलाई बढावा दिइरहेको तिनको आरोप छ । 

अधिकांश चिनियाँ विज्ञापनमा चाहिँ गोरा, गोलो ठूलो आँखा भएका मोडलहरु प्रयोग गरिन्छ र उनीहरुले पनि आफ्नो उत्पादनका लागि त्यस्तै मोडल किन नराखेको भनेर धेरैले प्रश्न गरेका छन् । 

यसअघि चिनियाँ दैनिकले पश्चिमी स्तरको सुन्दरतालाई नै धेरै लामो समयदेखि विश्वस्तरीय मानिँदै आएको विषयमा प्रकाश पारेको थियो । 

त्यसमा भनिएको छ, “हरेक कुरामा पश्चिमी धारणा नै हुनुपर्छ भन्ने छैन । र चिनियाँहरुले महिलाको सुन्दरतालाई लिएर पश्चिमले स्थापित गरेको स्तर या कस्ता महिलालाई सुन्दर ठहर्याउने भन्ने कुरा अपनाउन जरुरी छैन । ”

यसरी चिनियाँ ब्रान्ड भएर पनि चिनियाँ उपभोक्ता के कुरामा बढी संवेदनशील छन् भन्ने नबुझ्नु गलत भएको पनि यसमा थप बताइएको छ । 

यसरी १९ औँ शताब्दी तिर चिम्से आँखालाई एसियाली मूलको रुप दिएर व्यंग्य गर्ने चलन थियो जसलाई अहिले भने आपत्तिजनक मानिन्छ । पश्चिममा चिम्से आँखा देखाएर एसियाली मूलका मानिसहरुमाथि भेदभाव गरिएको धेरै लामो इतिहास पनि छ । 

तरपनि मोडल न्याङले हालको विवादमा मानिसहरु आफूप्रति केही नम्र भए हुन्थ्यो भन्ने चाहेको बताइन् । आफ्नो स्वरुप मन नपरेपनि हमला गर्न जरुरी नभएको उनको भनाइ छ । 

उनले वेइबोको पोस्टमा लेखेकी छन्, “मेरो आँखा यस्तै छ । अझ वास्तविक जीवनमा झन सानो छ । तर सबैको आफ्नै ‘चार्म’ आफ्नै विशेषता हुन्छ होइन र ?” बीबीसीबाट