काठमाडौं । गोरखामा आयोजित एक कार्यक्रममा साहित्यका लागि पर्यटन काव्य यात्रा एवम् सांस्कृतिक कार्यक्रम सम्पन्न भएको छ । उक्त कार्यक्रमका अधिकांश वक्ताले स्थानविशेषको महत्व उजागर गर्न र जनचासो बढाउन लेखक/कविको सिर्जनशीलता महत्वपूर्ण हुने बताएका छन् । 

अन्तर्राष्ट्रिय साहित्य समाज अनेसास नेपाल च्याप्टरद्वारा आयोजित कार्यक्रममा गोरखा नगरपालिकाका प्रमुख राजनराज पन्तले साहित्यकारहरूको स्वागत गर्दै राष्ट्र निर्माता पृथ्वीनारायण शाहको योगदान र राष्ट्रिय एकतामाथि थप गहन सृजना गर्न आग्रह गरे । 

उनले लेखक कविको सृजनालाई थप व्यवस्थित र नगरपालालिकालाई वैभवशाली बनाउन गोरखा नगरपालिकाले प्रज्ञा प्रतिष्ठान गठन गर्न लागेको जानकारी दिए । 

अनेसासका बोर्ड अफ ट्रस्टकी अध्यक्ष गीता खत्रीले पर्यटन प्रवर्द्धन गर्न साहित्यकारहरु विभिन्न ठाउँ पुगेर लेख्नुपर्नेमा जोड दिइन् । कार्यक्रममा साहित्यकार लिला लुइँटेल, सन्ध्या पहाडी, जयदेव भट्टराई, बिना श्रेष्ठ, मणि लोहनी, रेणु थापा सोलु, विमला निरौला, शान्ता बस्नेत लगायतले पर्यटन र साहित्यका सम्बन्धमा बोलेका थिए ।

कार्यक्रममा कविहरू नारायण पोखरेल, मणि लोहनी, विजयभक्त उपाध्याय, यदु अधिकारी, सुरेन्द्र देवकोटा, गीता कार्की, कल्पना एलिशा ढुंगाना, प्रदीप रोदन, गीता मैनाली, शुष्मा आचार्य अंशु, कल्पना खरेललगायतले कविता वाचन गरेका थिए ।

काठमाडौंबाट गोरखा पुगेको साहित्यकारहरूको टोलीले ऐतिहासिक गोरखा दरबारको भ्रमण गरेको थियो ।