नयाँ दिल्ली । यही जनवरी १० तारिखका लागि तय भएको ‘भाइब्रेन्ट गुजरात’को दशौँ वार्षिक सम्मेलनको मिति सारिएको छ । बढ्दो कोरोना संक्रमणका कारण मिति सारिएको जनाइएको छ ।

गुजरात सरकारले अब जनवरी १२ मा उक्त सम्मेलनको उद्घाटन गरिने जानकारी दिएको छ । सम्मेलनको उद्घाटन मिति दुई दिन पर सारिएको हो ।

नेपालका प्रधानमन्त्री शेरबहादुर देउवासहित अरू पाँच देशका राष्ट्र/सरकार प्रमुखहरू र कुल २६ देशका प्रतिनिधि सहभागी हुने तय भएको सो भव्य सम्मेलन लामो समयदेखि चर्चामा रहँदै आएको छ । भारतीय सञ्चारमाध्यमका अनुसार यसलाई विश्वकै प्रतिष्ठित ‘बिजनेस नेटवर्किङ’मध्येको एक ग्लोबल ‘फोरम’ मानिन्छ ।

हरेक दुई वर्षमा आयोजना गरिने यो समारोहको सन् २०२२ को कार्यक्रम पनि भारतीय प्रधानमन्त्री नरेन्द्र मोदीले उद्घाटन गर्ने तयारी छ । समारोहमा नेपालका देउवा, रुसका प्रधानमन्त्री मिखेल मिस्हुस्तीन, मोजाम्बिकका राष्ट्रपति फिलिपे जेकिन्टो न्युसी, मरिसियसका प्रधानमन्त्री प्रभिन्द जुगनथ र स्लोभेनियाका प्रधानमन्त्री जेनेज जन्सा सहभागी हुने गुजरात सरकारले जनाएको छ ।

यससँग सहकार्य गर्ने अरू मुलुकहरूमा जर्मनी, फ्रान्स, इटाली, क्यानडा, अष्ट्रेलिया, जापान, रुस, बेलायत, यूएई, इजरायल, स्वीडेन, दक्षिण कोरिया, डेनमार्क र फिनल्यान्ड छन् ।

विश्व नेताहरूका साथै सम्मेलनमा ग्लोबल बिजनेस टाइकुन, ठूलठूला लगानीकर्ता र कार्यकारी प्रमुखहरूले पनि भाग लिनेछन् । भारतका मुकेश अम्बानीदेखि टाटा ग्रुप, अद्नानी ग्रुपलगायत विभिन्न हाई प्रोफाइल अतिथिहरू उपस्थित हुने जनाइएको छ ।

यसअघि, गुजरातका मुख्यमन्त्री भूपेन्द्र पटेलले भनेका थिए, “हामीले १५ विदेशीमन्त्री, चार गभर्नर, राष्ट्र प्रमुखहरू र विभिन्न ग्लोबल ब्रान्डका कार्यकारी प्रमुखहरूको उपस्थिति पक्का गरिसकेका छौँ । त्यसैले भाइब्रेन्ट गुजरातको २०२२ को सम्मेलनले स्टेकहोल्डरहरूका लागि नयाँ बेन्चमार्क राख्ने अपेक्षा रहेको छ ।”

‘भाइब्रेन्ट गुजरात ग्लोबल समिट’ प्रधानमन्त्री मोदीको नेतृत्वमा सुरु गरिएको ‘अवधारणात्मक समारोह’ हो ।

यसको मुख्य थिम ‘आत्मनिर्भर गुजरातबाट आत्मनिर्भर भारतसम्म’ भन्ने रहेको छ । विगत लामो समयदेखि गुजरात भारतको सबैभन्दा प्रगतिशील स्टेट रहँदै आएको हुँदा विश्व अर्थतन्त्रमा यसले पुर्‍याउने योगदानलाई विस्तार गर्ने अभिप्रायसहित विदेशी मुलुकहरूलाई पनि यसमा सहभागी गराइएको छ । यसमा विदेशी राष्ट्रहरूसँगको व्यावसायिक सहकारिता बढाउनेतर्फ केन्द्रित रहने गरिएको छ ।

उक्त फोरमले समावेशी सामाजिक आर्थिक वृद्धि विकासका लागि रणनीतिक सहकारिता आदानप्रदानको अवसर दिलाउँछ । साथै, व्यावसायिक ज्ञान र सीपबारे पनि छलफल गरिन्छ ।