काठमाडौं । प्रहरीले काठमाडौंबाट ठूलो परिणाममा लागुऔषधसहित १० जना बढीलाई पक्राउ गरेको छ । पक्राउ पर्नेमा दुईजना महिला समेत छन् ।

स्रोतका अनुसार लागुऔषध नियन्त्रण व्युरोको टोली ६/७ हजार एम्पुल लागुऔषधसहित उनीहरुलाई पक्राउ गरेको हो ।

उनीहरुलाई काठमाडौंको विमानस्थल क्षेत्र, चावहिल, मुलपानीलगायतका क्षेत्रबाट पक्राउ गरिएको बताइएको छ । स्रोतका अनुसार सिन्धुली कारागारमा रहेका गुड्डु नामका एकजनाले लागुऔषध गिरोह सञ्चालन गरेको सूचनापछि प्रहरी अनुसन्धानमा सक्रिय थियो । गुड्डु १० वर्षअधि ब्राउन सुगरसहित पक्राउ परेर सिन्धुली कारागारमा सजाय काटिरहेका थिए ।

उनले भारतबाट लागुऔषध मगाउने र उनीसँगै कारागारमा रहेका अर्का व्यक्तिमार्फत काठमाडौंमा ‘सप्लाई’ हुने गरेको प्रहरी अनुसन्धानबाट खुलेको छ ।

गुड्डुलाई हाल रौतहट कारागारमा सारिएको बताइएको छ । लागुऔषध नियन्त्रण व्युरोले पत्रकार सम्मेलनमार्फत विस्तृत विवरण सार्वजनिक गर्ने तयारी गरेको छ ।