काठमाडौं । सिल्क ग्रुप र नेपाल टेलिकमले काठमाडौं टिम च्याम्पियनसिप कर्पोरेट ब्याडमिन्टनको फाइनलमा स्थान बनाएका छन् । 

दशरथ रङ्गशालाको कभर्डहलमा जारी प्रतियोगितामा सिल्क ग्रुपले नेपाल बिद्युत प्राधिकरणलाई ३–१ ले पराजित गर्दै उपाधि भिडन्त पक्का गरेको हो । 

सिल्क ग्रुपका विकास श्रेष्ठले बिद्युत प्राधिकरणका दीपक बोहरालाई २१–१८, २१–१७ ले तथा अनुमाया राईले बिद्युत प्रधिकरणकी शोभा गौचनलाई २१–१६, १८–२१, २१–१३ ले पराजित गरेका थिए । तेस्रो खेलमा बिद्युत प्रधिकरणका श्रीप्रसाद धिमाल र राजु महर्जनको जोडीले सिल्क ग्रुपका सुबाश अधिकारी र रमेश शेर्पाको जोडीलाई २१–११, २१–१४ ले पराजित गर्दै २–१ को अवस्थामा बनाए । 

त्यस्तै सिल्क ग्रुपका अनुमाया र ताशी शेर्पाको जोडीले बिद्युत प्रधिकरणका शोभा र यामकुमारी गुरुङको जोडीलाई २१–१३, २१–१९ले पराजित गर्दै ३–१ ले नतिजा आफ्नो पक्षमा पारे । 

नेपाल टेलिकमले  नेपाल आयल निगमलाई ३-२ ले हराउँदै सिल्क ग्रुपसँगको भेट पक्का गरेको हो । पहिलो खेलमा टेलिकमका रत्नजित तामाङ्गले आयल निगमका बिष्णु कटुवाललाई २१–७, २१–१०ले पराजित गरे ।  दोस्रो खेलमा आयल निगमकी रशिला महर्जनले टेलिकमकी सीमा राजबंशीलाई २१–१२, २१–८ ले पराजित गर्दै १–१ को बराबरी गरिन्  । तेस्रो खेलमा टेलिकमका सुरेन्द्रसिंह कार्की र हरिकृष्ण शर्माको जोडीले आयल निगमका लक्ष्मण बिश्वकर्मा र राम बिश्वकर्माको जोडीलाई २१–९, २१–८ ले पराजित गर्दै २–१ को स्थितिमा ल्याए ।  चौथो खेलमा आयल निगमका रशिला महर्जन र सर्मिला कटुवालको जोडीले टेलीकमका जे.टी.गुड्डी कार्की र सिमा राजबंशीको जोडीलाई २१–१२, १६–२१, २१–८ ले पराजित गर्दै खेललाई दुई दुईको अवस्थामा पुर्‍याए ।

पाँचौ तथा अन्तिम खेलमा टेलीकमका हरिकृष्ण शर्मा र रत्नजित तामाङको जोडीले आयल निगमका राम बिश्वकर्मा र बिष्णु कटुवालको जोडीमाथि २१–१८, २१–९ को जित निकाल्दै ३–२ को जित निकाल्यो ।