काठमाडौं । नेपाल टेलिकमले बुधबार नेपाल बिद्युत प्राधिकरण र नेपाल राष्ट्र बैंकलाई हराउँदै काठमाडौं टिम च्याम्पियनसिप ब्याडमिन्टन प्रतियोगिताको सेमिफाइनलमा स्थान पक्का गरेको छ । 

नेपाल टेलिकमले अब फाइनल प्रवेशका लागि आईएमई ग्रुपसँग प्रतिस्पर्धा गर्नेछ । दुई खेलमा हारेको आईएमई उपाधिको होडबाट बाहिरिसकेको छ । 

प्रतियोगिताको पहिलो दिन राष्ट्र बैंकलाई ३–० ले हराएको टेलिकमका रत्नजितले बुधबार राष्ट्र बैंकका दिपेश धामीलाई २१–१५, २२–२४, २१–१७ को स्कोरमा पराजित गरे । टेलिकमकी सीमा राजबंशीले राष्ट्र बैंककै अमिता गिरीलाई २१–११, १२–२१, २१–१८ को स्कोरमा हराइन् । टेलिकमका सुरेन्द्रसिंह कार्की र राजेन्द्र श्रेष्ठको जोडीले राष्ट्र बैंकका रिसीकेश भट्ट र डिलाराम सुवेदीको जोडीलाई २१–१४, २१–१४ को स्कोरमा हराएको हो । 

टेलिकमले बिद्युत प्रधिकारणलाई ३–२ ले हराएको हो । टेलिकमका रत्नजितले बिद्युत प्रधिकारणका दीपक बोहरालाई २१–९, २१–११ को स्कोरमा हराएका थिए । बिद्युत प्रधिकरणकी शोभा गौचनले टेलिकमकी सिमा राजबंशीलाई २३–२१, २४–२२ को स्कोरमा हराइन् । तेस्रो खेलमा टेलिकमका शोभाकर भण्डारी र सुरेन्द्रसिंह कार्कीको जोडीले बिद्युत प्रधिकारणका टेकबहादुर बुढा र रत्न श्रेष्ठको जोडीलाई २१–१५, २१–१७ को स्कोरमा हराए । चौथो खेलमा बिद्युत प्राधिकरणका शोभा गौचन र यामकुमारी गुरुङ्गको जोडीले टेलिकमका जे.टी. गुड्डी कार्की र सिमा राजबंशीको जोडीलाई २१–१५, २४–२२ को स्कोरमा हराएउँदै २–२ को बराबरी गरे । निर्णायक खेलमा टेलिकमका कृष्ण शर्मा र रत्नजितको जोडीले विद्युत प्राधिकरणका दीपक बोहरा र राजु महर्जनको जोडीलाई २१–१९, २१–१० को स्कोरमा हराउँदै ३–२ को नतिजा निकाल्यो । जितसँगै टेलिकमले अन्तिम चारमा स्थान पक्का गरेको हो । 

सिल्क ग्रुपले कुमारी बैंक, कान्तिपुर पब्लिकेसन र नेपाल आयल निगमलाई हराउँदै अन्तिम चारमा स्थान पक्का गरेको हो । पहिलो दिन आयल निगममाथि ३–१ को जित निकालेको सिल्क ग्रुपले दोस्रो दिनको पहिलो खेलमा कान्तिपुर पब्लिकेसनलाई ३–२ ले हरायो । कान्तिपुरका साजनकृष्ण ताम्रकारले सिल्कका विकास श्रेष्ठलाई २१–१८, २१–१८ को स्कोरमा हराएका थिए । दोस्रो खेलमा सिल्ककी अनुमाया राईले कान्तिपुरकी सम्झना शर्मालाई २१–९, २१–१३ हराउँदै १–१ को बराबरी गरिन् । कान्तिपुरका प्रकाश बादु र ब्रिदेन सुब्बाको जोडीले सिल्कका सुबाश अधिकारी र रमेश शेर्पाको जोडीलाई १४–२१, २२–२०, २२–२० को स्कोरमा हराउँदै २–१ को अग्रता दिलाए । २–१ ले पछि परेको अवस्थमा सिल्कका अनुमाया राई र ताशी शेर्पाको जोडीले कान्तिपुरको रिमा गिरी र सम्झना शर्माको जोडीमाथि २१–४, २१–८ को स्कोरमा हराउँदै २–२ को बराबरी गरे । अन्तिम खेलमा सिल्कका रमेश शेर्पा र विकाश श्रेष्ठको जोडीले कान्तिपुरका ब्रिदेन सुब्बा र साजनकृष्ण ताम्राकारको जोडीलाई २१–१४, २१–१० को स्कोरमा हराउँदै ३–२ को नतिजा निकाले । 

सिल्कले अन्तिम खेलमा कुमारी बैंकलाई ३–१ ले हराएको हो । सिल्कका विकास श्रेष्ठले कुमारीका सुदीप सेढाईलाई २१–१५, २१–१० ले पराजित गरे । दोस्रो खेलमा अनुमाया राईले कुमारीकी सुनयना मुखियालाई २१–१०, २१–१६ ले हराइन् । तेस्रो खेलमा कुमारीका बिक्रम निरौला र निरज राईको जोडीले सिल्कका सुवास अधिकारी र रमेश शेर्पाको जोडीलाई २१–१७, १०–२१, २१–१७ ले हराउँदै २–१ को अवस्थामा ल्याए । चौथो खेलमा सिल्क ग्रुपको अनुमाया राई र ताशी शेर्पाको जोडीले ११–२ को अग्रता लिएको अवस्थामा कुमारी बैंककी सुनयना मुखियाको घुडामा चोट लागेपछि खेललाई त्याग्न बाध्य भइन् । त्यसपछि सिल्कले खेल जित्दै सेमिफाइनलमा स्थान पक्का गरेको हो ।