काठमाडौं । मौद्रिक नीति समीक्षापछि सेयर बजार घट्ने क्रमले आज पनि निरन्तरता पाएको छ । सातको पहिलो कारोबार दिन आइबार सेयर बजार परिसूचक नेप्सेमा ८८.७० अंक गिरावट हुँदा  २३६१.२७ अंकको  बिन्दुमा बन्द भएको छ ।

साउन अन्तिममा नेपाल राष्ट्र बैंकले चालू आर्थिक वर्षको लागि मौद्रिक नीति सार्वजनिक गरेपछि  घट्न सुरु भएको  नेप्से  त्यसयता साढे ३ महिनामा नेप्सेमा करिब ८४० अंकको  गिरावट भएको छ । भदौ २ गते ३१९९ अंकको  ऐतिहाँसिक उचाई कायम गरेको नेप्से मौद्रिक नीति सार्वजनिकपछि क्रमशM घटेर  कार्तिक २ गते २५१० अंकसम्म झर्यो ।

त्यसपछि केही सम्हालिएको नेप्से  दुई साता अगाडि राष्ट्र बैंकको मौद्रिक नीति समीक्षपछि ४०० अंकभन्दा माथिको गिरावट भइसकेको छ । मुद्रा बजारको नियामक निकायले गर्ने समीक्षाबाट धितोपत्र बजार प्रभावित भइरहेको छ भने तयसैलाई लिएर  ठूला भनिएको लगानीकर्तामा देखिएको स्वार्थको इगोमा हुँदा साना र नवप्रवेशी लगानीकर्ता मारमा परेका छन् ।

आज बजार परिसूचकसँगै सबै  उपसूचकमा  पनि गिरावट भएको छ । व्यापार उपसूचकमा सवार्धिक ७.४५ प्रतिशतको गिरावट हुँदा विकास बैंक उपसूचक ६.४१ प्रतिशत र बैंकिङ उपसूचक २.६६ प्रतिशतले गिरावट भएको छ । वित्त कम्पनी, हाइड्रोपावर र निर्जीवन बिमा उपसूचकमा पनि साढे ४ प्रतिशतभन्दा माथिको गिरावट भएको छ ।

नेप्सेमा गिरावट भए पनि पछिल्लो  दुई दिन तीन अर्बबाट पनि तल झरेको कारोबार रकम आज भने बढेर ३ अर्बमाथि पुगेको छ । आज नेप्सेमा  ७४ लाख ६० हजार ८७४ कित्ता सेयर किनबेच हुँदा तीन अर्ब  ३८ करोड  २५ लाख दश हजारको कारोबार भएको छ ।

आज कारोबार रकममा  बम्पर लाभांश प्रस्ताव गरेको मञ्जुश्री फाइनान्सले लिड गरेको छ ।  कम्पनीको ३१ करोडको कारोबार हुँदा नेशनल हाइड्रोपावरको १३ करोड ६४ लाख, नबिल बैंकको १ करोड ५९ लाख, महालक्ष्मी विकास बैंकको  ८ करोड र अपी पावरको  ७ करोडको कारोबार भएको छ ।

आज बजारमा  ५ वटा कम्पनीको सेयरमुलयमा सामान्य वृद्धि हुँदा अधिकांश कम्पनीको  सेयरमूल्य घटेको छ । स्वाभिमान लघुवित्त र युनिलिभर नेपालको सेयरमुल्य २ प्रतिशत, नारायणी विकास बैंकको  १.४६ प्रतिशत, मञ्जुश्री फाइनान्सको  १.१५ प्रतिशत  र सपोर्ट माइक्रोफाइनान्सको  सेयरमूल्य ०.३२ प्रतिशतले बढेको छ ।

यता नयाँ सारथी लघुवित्तको सेयर मूल्य घटेर सर्किट लेभलमा बन्द हुँदा जानकी फाइनान्सको ९.१७ प्रतिशतले घटेको छ ।