काठमाडौ । स्वदेशको स्थापित ब्राण्ड खुकुरी रमले आफ्नो नयाँ प्याकेजिङ (प्याक) सार्वजनिक गरेको छ । २० वर्षदेखि अस्तित्वमा रहेको पछिल्लो प्याकेजिङ परिवर्तन गरी विश्वविख्यात कम्पनीबाट डिजाइन गरिएको आकर्षक लुक्ससहितको नयाँ प्याक कम्पनीले सार्वजनिक गरेको छ । 

खुकुरी रम उत्पादन गर्ने ‘द नेपाल डिस्टीलरिज’ सन् १९५९ मा स्थापना भएको कम्पनी हो । कम्पनी स्थापनाको ६२ औं वर्षमा समयको माग र ग्राहकको अपेक्षालाई समेत ध्यानमा राखी कम्पनीले आफ्नो प्याकेजिङ परिवर्तन गरी अझ आकर्षक, विश्वस्तरीय एवम् वातावरणमैत्री बनाएको जनाएको छ ।

यसको डिजाइन लण्डनको एक कम्पनीले गरेको कम्पनीका महाप्रबन्धक शुभाष लामिछानेले बताए । खुकुरी रमले आफ्नो प्याक परिवर्तन गर्नुअघि र नयाँ प्याक डिजाइन गरिसकेपछि पनि देशविदेशका ग्राहकहरुमाझ रिसर्च एव प्रतिक्रिया लिइएको उनले बताए । “प्याक परिवर्तन गर्नुअघि र पछिका ग्राहकहरुबाट आएका प्रतिक्रियाहरुलाई समेत ध्यानमा राखेर नयाँ प्याकेजिङमा नेपाली सम्पदा, मौलिकपन र परम्पराहरु झल्किने गरी विशेषताहरु समावेश गरिएको हो,” उनले भने ।

प्याकेजिङ परिवर्तन भए पनि ब्लेण्ड र स्वादमा कुनै परिवर्तन नगरिएको कम्पनीले जनाएको छ  ।

२० वर्षदेखि बजारमा राम्रो छाप बनाउन सफल भएको कम्पनीले पुरानो प्याकको अन्तिम ब्याचका उत्पादनहरु एक महिनाअघि नै बन्द भइसकेको पनि जनाएको छ । तर, नयाँ प्याक लञ्च नहुञ्जेल बजारमा रहेको खुकुरी रमको पुरानो प्याक ग्राहकले सम्झनाका लागि राखेको समेत कम्पनीले जनाएको छ ।

नेपालबाहेक १३ देशका बजारमा समेत उपलब्ध हुँदै आएको खुकुरी रमको प्याकेजिङ स्थानीय र अन्तर्राष्ट्रिय बजारमा एकैसाथ परिवर्तन भएको हो । खुकुरी रमको वर्षौदेखिको मौलिक प्याकेजिङलाई ग्राहकको आकांक्षाअनुरुप परिस्कृत गर्दै तयार पारिएको नयाँ प्याकेजिङले स्थानीय र विश्व बजारका ग्राहकहरुको मन जित्ने विश्वास खुकुरी रमको उत्पादक, द नेपाल डिस्टीलरिजका महाप्रबन्धक शुभाष लामिछानेले व्यक्त गरे ।