काठमाडौं । आईसीसी टी–ट्वान्टी विश्वकप क्रिकेटको शीर्ष वरीयताको इंग्ल्यान्डले सुपर–१२ अन्तर्गत समूह–१ को शीर्ष स्थानमा रहँदै सेमिफाइनलमा स्थान बनायो । इंग्ल्यान्डसँगै हालसम्म टी–ट्वान्टी विश्वकपको उपाधि जित्न नसकेको अष्ट्रेलिया र न्युजिल्यान्डले पनि सेमिफाइनलमा स्थान बनाए ।

उपाधि दाबेदार टोली पाकिस्तानले अपराजित रहँदै सेमिफाइनलमा स्थान पक्का गर्‍यो ।

सुपर–१२ को पहिलो खेलमा वेस्ट इन्डिजलाई सहजै हराएको इंग्ल्यान्डले पाँच खेलबाट ८ अंक जोड्दै सेमिफाइनलमा स्थान बनाएको हो । इंग्ल्यान्डले आज समूह–२ को उपविजेता टोली न्युजिल्यान्डसँग प्रतिस्पर्धा गर्दै छ ।

समूह–२ अन्तर्गत पाकिस्तानसँग पराजित भएको न्युजिल्यान्डले पाँच खेलबाट ८ अंक जोड्दै समूहको दोस्रो स्थानमा रहेर सेमिफाइनलमा स्थान बनायो । यसै समूहमा रहेको पाकिस्तान अपराजित रहँदै सेमिफाइनलमा पुग्यो ।

सन् २०१९ मा भएको एकदिवसीय विश्वकप क्रिकेटको फाइनलमा इंग्ल्यान्डसित पराजित भएको न्युजिल्यान्ड आजको खेलमा बदला लिने योजनामा छ । उक्त प्रतियोगिताको फाइनलमा बाउन्ड्रीको आधारमा इंग्ल्यान्डले न्युजिल्यान्डलाई हराएको थियो । केन विलियमसनको कप्तानीमा रहेको न्युजिल्यान्ड तुलनात्मक रूपमा इंग्ल्यान्डभन्दा कमजोर छ ।

हालसम्म यी दुई टोलीले टी–ट्वान्टी अन्तर्राष्ट्रिय क्रिकेटमा २१ पटक प्रतिस्पर्धा गरेका छन् । त्यसमध्ये १३ खेल इंग्ल्यान्डले र सात खेल न्युजिल्यान्डले जितेको छ । एक खेल नतिजाविहीन भएको थियो ।

यस्तै, टी–ट्वान्टी विश्वकप क्रिकेटमा दुई टोलीबीच पाँचपटक भेट भएको छ । जसमा इंग्ल्यान्ड तीन खेलमा विजयी भएको छ भने न्युजिल्यान्डले दुई खेल जितेको छ ।

न्युजिल्यान्डका मार्टिन गुप्टिलको इंग्ल्यान्डविरुद्ध राम्रो रेकर्ड छ । उनले इंग्ल्यान्डविरुद्ध टी–ट्वान्टी खेलमा कुल ४६७ रन बनाएका छन् । यस्तै, इंग्ल्यान्डका इवोन मोर्गानले न्युजिल्यान्डविरुद्ध कुल ४२४ रन बनाएका छन् ।

बलिङतर्फ भने दुई टोलीबीचको टी–ट्वान्टी अन्तर्राष्ट्रिय क्रिकेटको रेकर्ड हेर्दा न्युजिल्यान्डका मिचेल स्टेनरले इंग्ल्यान्डविरुद्ध सर्वाधिक १६ विकेट लिएका छन् । यस्तै, टिम साउथीले कुल १२ विकेट लिएका छन् ।

यूएईको शेखजायद क्रिकेट रंगशालामा दुई टोलीबीचको खेल नेपाली समयानुसार साँझ ७ बजेर ४५ मिनेटमा सुरु हुनेछ ।