काठमाडौं । एनिस बार्धीले अन्तिम मिनेटमा विवादस्पद पेनाल्टीमा गोल गरेपछि लेभान्टेले गएराति स्पेनिस ला लिगामा एट्लेटिको मड्रिडसँग २–२ को बराबरी खेल्दै अंक खोसेको छ । 

भ्रमणकारी टोली एट्लेटिकोले एन्टोइन ग्रिजमनको गोलबाट १२औं मिनेटमा अग्रता लिएको थियो । ग्रिजमन बार्सिलोनाबाट पुनः एट्लेटिको फर्किएपछि ला लिगामा गरेको यो पहिलो गोल हो । ३७औं मिनेटमा बर्धीले पेनाल्टीमा बराबरी गोल फर्काएका थिए । ७६औं मिनेटमा म्याथुज कुन्हाले गरेको गोलबाट एट्लेटिकोले पुनः अग्रता लियो ।

८०औं मिनेटमा एट्लेटिकोका प्रशिक्षक डिएगो सिमोनीलाई रेफ्री पाब्लो गोन्जालेजले रातो कार्डको दर्शन गराएपछि उनी ‘टच लाइन’बाट बाहिरिएका थिए । 

९०औं मिनेटमा लेभान्टेले अर्को पेनाल्टी अवसर पायो । त्यसमा बेर्धीले गोल गरेपछि एट्लेटिको अंक बाढ्न बाध्य भयो । इन्जुरी समयमा रोबरले दोस्रो पहेंलो कार्डको सामना गरेपछि लेभान्टे दश खेलाडीमा सीमित बनेको थियो ।  

बराबरीपछि १० खेलबाट १९ अंक जोडेको एट्लेटिको छैटौं स्थानमा छ । जुन चौथो स्थानको रियाल बेटिसभन्दा दुई अंकले पछाडि हो भने शीर्ष स्थानको रियाल सोसिडाडभन्दा पाँच अंकले पछाडि हो । तथापि एट्लेटिकोले एक खेल कम खेलेको छ । 

रियाल सोसिडाडले गएराति नै सेल्टा भिगोलाई २–० ले हराएको थियो । रियाल सोसिडाडको गोलमा एलेक्जेन्डर इसाक र एरिट्ज इलुस्टोन्डोले गोल गरेका थिए । सेल्टा भिगो १० अंकका साथ १४औं स्थानमा छ । 

गएराति नै ग्रानाडा र गेटाफेले १–१ को बराबरी खेले ।