एपी । मासिमिलानो एलेग्रीको युभेन्टसमा प्रशिक्षकका रूपमा २००औँ खेल विर्सनलायक बन्यो । युभेन्टस गए राति घरेलु मैदानमा सासुओलोसँग २–१ ले पराजित भयो ।

भ्रमणकारी सासुओलो डेभिड फ्राटेसीले ४४औँ मिनेटमा गरेको गोलबाट अग्रता लिएको थियो । युभेन्टसका वेस्टन म्याककेनीले ७६औँ मिनेटमा बराबरी गोल फर्काए । तर, इन्ज्युरी समयमा म्याक्सिम जोपेजले गोल गरेपछि सासुओलोले तीन अंक पक्का गर्‍यो । सासुओलोले युभेन्टसको घरेलु मैदानमा जितेको यो पहिलोपटक हो ।

हारपछि युभेन्टस लिगको शीर्ष क्लब एसी मिलानभन्दा १३ अंकले पछाडि परेको छ । सातौँ स्थानमा रहेको युभेन्टसले १० खेलबाट १५ अंक जोडेको छ । शीर्ष क्लब मिलानको २८ अंक छ । सासुओलो १४ अंकका साथ नवौँ स्थानमा छ ।

इटालियन सिरी ‘ए’मा साबिक विजेता इन्टर मिलानले १० खेलाडीमा सीमित इम्पोलीलाई २–० ले हरायो । इन्टरको जितमा ड्यानिलो डी‘एम्ब्रेसियो र फेडरिको डिमार्कोले गोल गरे ।

५२औँ मिनेटमा सामुयल रिसीले रातो कार्डको सामना गरेपछि इम्पोली १० खेलाडीमा सीमित बनेको थियो ।

जितपछि २१ अंक जोडेको इन्टर तेस्रो स्थानमा छ । १२ अंकसहित इम्पोली १२औँ स्थानमा छ । एएस रोमा १९ अंकका साथ चौथो स्थानमा छ । रोमाले गए राति काग्लिएरीलाई २–१ ले हराएको थियो ।

त्यस्तै, पाँचौँ स्थानको एटलान्टाले साम्पडोरियालाई ३–१ ले हरायो । एटलान्टाले १० खेलबाट १८ अंक जोडेको छ । त्यो शीर्ष स्थानको मिलानभन्दा ९ अंकले पछाडि हो ।

छैटौँ स्थानको लाजियोले पनि गए राति फ्लोरेन्टिनालाई १–० ले हरायो । लाजियोले १७ अंक जोडेको छ भने १५ अंकसहित फ्लोरेन्टिना आठौँ स्थानमा छ ।