एजेन्सी । ड्याभी क्लासेनको गोलमा नेदरल्यान्ड्सले गएराति विश्वकप छनोट प्रतियोगितामा लाटभियालाई १–० ले हराएको छ । त्यस्तै क्रोएसियाले पनि साइप्रसमाथि ३–० को विजय हासिल गर्यो ।

भ्रमणकारी नेदरल्यान्ड्सको जितमा क्लासेनले १९औं मिनेटमा गरेको गोल निर्णायक बनेको हो । जितसँगै नेदरल्यान्ड्सले समूह ‘जी’ को शीर्ष स्थानमा दुई अंकको अग्रता लिएको छ । 

नेदरल्यान्ड्सले सात खेलबाट १६ अंक जोडेको छ । समान खेलबाट १४ अंक जोडेको नर्वे दोस्रो स्थानमा छ । नर्वेले गएराति तेस्रो स्थानको टर्कीसँग १–१ को बराबरी खेल्यो । टर्कीले १२ अंक जोडेको छ । ११ अंकका साथ चौथो स्थानमा रहेको मोन्टेनेग्रोले जिब्राल्टरलाई ३–० ले हरायो । 

नेरदल्यान्ड्ले अब सोमबार जिब्राल्टरविरुद्ध खेल्ने । नर्वेले मोन्टेनेग्रो र टर्कीले लाटभियाविरुद्ध खेल्नेछ ।

समूह ‘एच’ मा क्रोएसिया र रुसले आ आफ्नो खेल जित्दै समान १६ अंक जोडेका छन् । तथापि गोल अन्तरमा क्रोएसिया अगाडि छ । 

क्रोएसियाले साइप्रसलाई ३–० ले हराएको हो । क्रोएसियाको जितमा इभान पेरिसिच, जोस्को भार्डिओल र मार्को लिभाजाले गोल गरे । रियाल मड्रिडका मिडफिल्डर लुका मोड्रिच पेनाल्टीमा गोल गर्न चुके ।

रुसको जितमा स्लोभाकियाका मिलान स्क्रिनियरले गरेको आत्मघाती गोल निर्णायक बन्यो । समूह ‘एच’ मै स्लोभेनियाले माल्टालाई ४–० ले हरायो । 

समूह ‘ई’ मा वेल्सले चेक गणतन्त्रसँग २–२ को बराबरी खेल्यो । बराबरीपछि ५ खेलबाट आठ अंक जोडेको वेल्स तेस्रो स्थानमा छ । ६ खेलबाट समान आठ अंक जोडेको चेक गणतन्त्र दोस्रो स्थानमा छ । यस समूहमा बेल्जियम १६ अंकका साथ शीर्ष स्थानमा छ । स्टोनियाले बेलारुसलाई २–० ले हरायो । स्टोनिया चौथो र बेलारुस पाँचौं स्थानमा छन् ।