काठमाडौं । तरलता अभावमा जुधिरहेका बैंकहरुले एक सातामै ३१ अर्ब कर्जा विस्तार गरेका छन् । नेपाल बैंकर्स संघले उपलब्ध गराएको तथ्याङ्क अनुसार वाणिज्य बैंकहरुको असोज १ गतेदेखि ८ गते शुक्रबारसम्म ३१ अर्बले कर्जा विस्तार गरेका छन् । 

चालु आर्थिक वर्षको सुरुवातबाट नै तरलता अभाव झेलिरेहका बैंकहरु कर्जा विस्तार उच्च भए पनि निक्षेप बढ्न नसक्दा समस्यामा पर्दै गएका छन् । केही बैंकहरुले सीआरआर व्यवस्थापनकै लागि स्थायी तरलता सुविधा (एसएलएफ) लिइरहेका छन् भने कर्जा लगानी क्षमता भएका बैंकहरुले पनि तरलता अभाव हुँदा एसएलएफ लिएर नै कर्जा लगानी गरिरहेका छन् ।

भदौ मसान्तमा ३८ खर्ब ७२ अर्ब रहेको वाणिज्य बैंकहरुको कुल कर्जा लगानी भदौ ८ गतेसम्म पुग्दा ३१ अर्बले बढेर ३९ खर्ब ३ अर्ब पुगेको छ । कर्जा विस्तार ‘एग्रेसिभ’ देखिएका बैंकहरुको निक्षेप भने तुलनात्मक रुपमा न्यून बढेको छ ।

भदौ मसान्तमा ४१ खर्ब ७१ अर्ब रहेको वाणिज्य बैंकहरुको कुल निक्षेप असोज ८ गतेसम्म ९ अर्बले बढेर ४१ खर्ब ८० अर्ब पुगेको छ ।

वाणिज्य बैंकहरुले २०७८ असार मसान्तको  भन्दा कर्जा लगानी करिब १ खर्ब ८२ अर्बले विस्तार गरिसक्दाम पनि चालु आर्थिक वर्ष लागेपछि बैंकिङ प्रणलीबाट बाहिरीएको निक्षेप भने अझै प्रणालीमा आउन सकेको छैन । असार मसान्तमा ३७ खर्ब २१ अर्ब रहेको कर्जा लगानी असोज ८ मा बढेर ३९ खर्ब ३ अर्ब पुगेको छ । तर, निक्षेप संकलन भने असार मसान्तमा ४२ खर्ब १ अर्ब रहेकोमा चालु आर्थिक वर्ष लागेपछि भदौ ४ गते ४१ खर्ब १७ अर्ब झरेकोमा त्यसपछि क्रमशः बढेर असोज ८ मा ४१ खर्ब ८० अर्ब पुगेको छ ।

बैंकिङ प्रणालीमा रहेको रकम राजश्वको रुपमा सरकारको सञ्चित कोषमा जम्मा भएको तर सरकारको बजेट खर्च हुन नसक्दा बैंकहरुको निक्षेप प्रभावित भयो । तीन  तहका सरकारको सञ्चित कोषमा २ खर्बभन्दा बढी रकम रहेको महालेखा नियन्त्रकको कार्यलेले जनाएको छ । तर, बैंकिङ प्रणालीमा भने तरलताको चरम अभाव रहेको छ । अर्कोतर्फ रेमिट्यान्समार्फत भित्रिएको  रकम आयातलाई नै धान्न नसक्ने अवस्था रहँदा निक्षेप बढ्न नसकेको हो ।