जेनेभा । स्विट्जरल्यान्डले समलैगिंक विवाहलाई मान्यता दिने भएको छ । आइतबार भएको जनमतसंग्रहमा भारी बहुमतले समलैंगिक विवाहलाई स्वीकृत गरेको हो । आधिकारिक नतिजाअनुसार समलैंगिक विवाहको पक्षमा ६४.१ प्रतिशत मतदाताले मतदान गरेको एपीले जनाएको छ ।

स्विट्जरल्यान्डको सबै २६ वटै क्यान्टोनमा समलैंगिक विवाहको पक्षमा बहुमत आएको हो । 

स्विट्जरल्यान्डको संसद् र संघीय परिषद्ले “सबैका लागि विवाह” नीतिलाई समर्थन गरेको थियो । उसले सन् २००७ देखिनै समलैंगिक जोडी (सेम–सेक्स सिभिल पार्टनरसिप) लाई अनुमति दिएको थियो ।

यसका समर्थकले अब समलैंगिक जोडीले पनि विपरीत लिंगीले जस्तै बच्चा धर्मपुत्र/धर्मपुत्री राख्न पाउने र समलैंगिक दम्पत्तीको पहिचानसहितको नागरिकता पाउन सक्ने बताएका छन् । तर, यसका विरोधीले भने समलैंगिक जोडीलाई विवाहको पूर्ण अधिकारले परिवार आधारित एक पुरुष र एक महिलाबीचको विवाहलाई कमजोर बनाउने विश्वास गर्छन् ।

योसँगै समलैंगिक विवाहलाई मान्यता दिने देशको संख्या ३० पुगेको छ । युरोपेली मुलुक नेदरल्याण्डले २००१ मा पहिलोपटक समलैंगिक विवाहलाई कानूनी मान्यता दिएको थियो । एपीबाट ।