काठमाडाैं । अर्घाखाँची सिमेन्टद्वारा उत्पादन भइरहेको अर्घाखाँची ओपीसी सिमेन्टले ४३ ग्रेड सिमेन्टको इजाजत प्राप्त गरेको छ । नेपाल गुणस्तर तथा नापतौल विभागले एनएचएस–५७२ प्रमाणीकरण गरी कम्पनीलाई आज ४३ ग्रेडको प्रमाणपत्र हस्तान्तरण गरेको हो ।

आफ्नो उत्पादनको गुणस्तर नेपाल सरकारद्वारा औपचारिक रूपमा नै प्रमाणित भएको भन्दै कम्पनीले गुणस्तरीय सिमेन्टको उत्पादन र बिक्री वितरणलाई सधैँ प्राथमिकतामा राख्ने जनाएको छ ।  हालसम्म ३३ ग्रेड सो सहरको मान्यता पाइरहेको उत्पादनलाई ४३ ग्रेडको प्रमाणीकरणले आम उपभोक्तालाई अर्घाखाँचीका उत्पादनहरूको प्रयोग गर्न थप निश्चिन्त बनाउने कम्पनीका महाप्रबन्धक उद्धब कार्कीले बताए ।

गुणस्तर तथा नापतौल विभागले सिमेन्टमा उच्च गुणस्तरको सुनिश्चितता गर्ने उद्देश्यले यस वर्षदेखि एनएचएस–५७२ को अवधारणासहित ग्रेडिङ प्रणालीलाई अघि सारेको हो ।

गत आर्थिक वर्ष पब्लिक लिमिटेडमा परिणत भएसँगै कम्पनीले  धितोपत्रको सार्वजनिक निष्कासन गर्ने तयारी सुरु गरेको छ ।   

२०७५ सालदेखि आफ्नो कुल उत्पादन क्षमतालाई बढाएर प्रतिवर्ष १० लाख टन पुर्‍याएको कम्पनीले लगभग पूर्ण उत्पादन क्षमतामा सञ्चालनमा रहेको छ ।  लकडाउनको बाबजुत पनि गत आर्थिक वर्ष २०७७/७८ मा १८ प्रतिशतले बिक्री बढाउन सफल भएको कम्पनीले जनाएको छ ।

“सर्वसाधारणको लागि सेयर जारी गर्नेगरी अगाडि बढाइरहेका छांँ,” कम्पनीका प्रमुख वित्त अधिकृत राजु पौडेलले भने “यही मितिमा सार्वजनिक निष्कासन गर्छाैँ भन्ने नभएपनि अर्को आर्थिक वर्षभित्र सर्वसाधारणलाई सेयर जारी गरिसक्ने हिसाबले काम अगाडि बढाइरहेका छौँ ।”