काठमाडौं । नेपाल–युरोपियन फिल्म फेस्टिभल (नियुफ) को ब्रान्ड एम्बेस्डरमा अभिनेता दयाहाङ राई नियुक्त भएका छन् । आयोजक युरोपियन युनियनको नेपालस्थित डेलिगेसनले उनलाई फेस्टिभलको दूतमा नियुक्त गरेको हो । 

“लोकप्रिय कलाकार/अभिनेता दयाहाङ राई नेपाल–ईयू चलचित्र महोत्सव (नियुफ्) का लागि (ब्रान्ड) एम्बेस्डर अथवा दूत हुनु भएको सूचित गर्न पाउदाँ हामी गर्वित छौँ । उहाँले चलचित्र महोत्वस अवधिभर नै हाम्रा विभिन्न संस्कृतिहरूबीचको (सजीव) सम्वाद तथा विश्वका लागि हाम्रो परिकल्पनाहरूलाई पूर्ण रूपमा साकार तुल्याउनका लागि हामीसँग मिलेर काम गर्नु हुनेछ,” नेपालस्थित डेलिगेनले लेखेको छ ।

यो फेस्टिबलमा पर्यावरणीय चुनौती तथा जलवायु परिवर्तनसँग सम्बन्धित दुई देशका चलचित्रहरू प्रदर्शन गरिने छन् ।
 
यसैगरी डेलिगेसनले युरोपियन युनियनको साइटमा लग इन गरेर निःशुल्क युरोप र नेपालको सांस्कृतिक मिलनलाई समेट्ने चलचित्रहरू हेर्न सकिन्छ । अभिनेता दयाहाङ राईले पनि फेस्टिभलसँग जोडिन पाउँदा खुसी भएको बताउछन् । महामारीका कारण फिल्मका सार्थक गतिविधि ठप्प भएको समयमा भर्चुअल रूपमै भए पनि हुने फेस्टिभलले फिल्मकर्मीमा ऊर्जा सञ्चार गर्ने दयाहाङको तर्क छ ।
 
“महामारीले फिल्मका गतिविधि ठप्प भएको समयमा फिल्म फेस्टिभल हुनु नै सकारात्मक कुरा हो । अझ फेस्टिभलमा नेपाली फिल्म पनि समावेश हुने रहेछन् । यसले झनै उत्साहित तुल्याएको छ,” उनले भने, “यो फेस्टिभल आफैँमा सांस्कृतिक आदान प्रदान जस्तो हो । यसले हाम्रो फिल्म साक्षरताका लागि पनि महत्वपूर्ण योगदान गर्छ ।”

नेपाल युरोपियन फिल्म फेस्टिभलको यो दसौँ संस्करण यही असोज १ देखि ९ गतेसम्म भर्चुअल रूपमा सञ्चालन हुनेछ ।