काठमाडौं । दश वर्षदेखि अनामनगरमा रहेको मण्डला थिएटरलाई पछ्याउनेहरुले अब केही समय पछि उक्त स्थानमा सो थिएटर भेट्ने छैनन् । त्यसो भए के अब मण्डला थिएटर गुरुकुलकै हालतमा पुगेको हो ? 

भाग्य भनौं या कर्म ? सायद कर्मभन्दा उचित होला । अनामनगरको मण्डला खोज्दै अब नाटकप्रेमीहरु थापा गाउँ पुग्नुपर्ने छ ।

कहिलेबाट ? 

सायद कात्तिकदेखि । कात्तिकदेखि मण्डलाका रङ्गकर्मी र उनीहरुको पफर्मेन्स हेर्न थापागाउँ जानुपर्ने छ । ३२ आना जग्गा भाडामा लिएर अहिले धमाधम निर्माण कार्य चलिरहेको छ । मण्डलाका रङकर्मीहरु अहिले त्यहीँ ब्यस्त छन् ।

मण्डलाको नयाँ नाटक घर केही महत्वाकांक्षी छ, यो पटक दुईवटा हल हुनेछन् । ति हल अहिलेकोभन्दा केही परिमार्जित र आकर्षक हुनेछन् । मण्डलाकर्मीहरुकै शब्द सापटी लिने हो भने ‘आर्ट हाउस’को नजिक रहेर हल निर्माण हुनेछन् । एउटा नाटक पफर्मेन्स गर्ने हल हुनेछ भने अर्को हल नाटकसम्बन्धी सिर्जनात्मक काम गर्नका लागि बनाइने छ । उक्त हल चलचित्र छायांकन पनि गर्न सक्ने गरि डेकोरेट गरिने छ । अन्य प्रयोजनका लागि पनि हलहरु निर्माण भइरहेका छन् । 

अनामनगरमा पर्याप्त जग्गा नहुँदा पार्किङ अभाव थियो । तर, यहाँ भने दर्शकले आफ्नो सवारी साधन पार्किङ गर्न पाउने छन् । मण्डलाले डेकोरेशनमा विशेष ध्यान दिनेछ ।

मंसिरसम्म थिएटर सञ्चालनमा ल्याउने लक्ष्य रहेको छ । वार्षिकउत्सव पारेर मंसिरको पहिलो हप्ता सर्ने तयारी रहेको छ । 

कुल लगानी करिब साढे तीन करोडको हुनेछ । कोरोनाका कारण निर्माण कार्यमा कुैनै अवरोध नआए कात्तिकमा मण्डलाको नयाँ भवनमा दर्शकले नाटक हेर्न पाउँने छन् । 

“प्रायः नेपाली रङ्गमञ्चहरुको अवस्था उस्तै–उस्तै छ । केही वर्ष चल्ने र बन्द हुने गरेका छन् । त्यसैले त्यो नियती नदोहोरियोस भनेर हामी बेलैमा नयाँ थिएटर बनाउन सुरु गरेका हौं,” मण्डलाका एक रङ्गकर्मी भन्छन्, “कम्तीमा निरन्तरता होस् भन्ने हाम्रो चाहना हो । त्यसैले कोरोनाका कारण फुर्सदिलो बनेको यो समय हामीले कन्ट्रक्सनमा खर्चिरहेका छौं ।”    

१३ जनाको लगानी रहेको मण्डला थिएटरमा लगानीकर्ताले आफैं लगानी जुटाउने छन् । “यति धेरै रकम त हामीसँग पनि छैन, लोन नै लिने हो,” ति सदस्यले भने । 

आगामी रणनीति तय गर्नभन्दै दयाहाङ राई, राजन खतिवडा, बुद्दि तामाङ, विजय बराल लगायत १३ जनामध्ये ११ जना नगरकोट पुगेर तीनदिनमा सोमबार फर्किएका छन् । 

१६ जना नाटक पढिरहेका विद्यार्थीलाई रेसिडेन्सियल रूपमा नयाँ भवनमा बसेर पढिरहेका छन् । 

अनामनगरमा महिनाको एक लाख रुपैयाँ तिर्दै आएको मण्डलाले नयाँ भवनमा सरेपछि प्रतिमहिना साढे तीन लाख रुपैयाँ जग्गाको भाडा तिर्नुपर्नेछ ।

केही समय रङ्मञ्चहरु सञ्चालन भएर बन्द भइरहेको अवस्थामा मण्डला थिएटर भने ठूलो लगानी गरेर आफूलाई थप थप सशक्त बनाउने योजना बनाएको हो ।