काठमाडौं । नेपाल उद्योग वाणिज्य महासंघका अध्यक्ष शेखर गोल्छाले समग्रमा मौद्रिक नीति सकारात्मक रहेको बताएका छन् । उनले निजी क्षेत्रले दिएका अधिकांश सुझाव समेटिएको पनि बताए ।

उद्यम व्यवसाय सञ्चालन गर्न १ करोड वा सो भन्दा कम ऋण उपयोग गर्ने ऋणीको हकमा आधार दरमा अधिकतम २ प्रतिशत बिन्दुले मात्र प्रिमियम थप गर्न सक्ने व्यवस्था स्वागतयोग्य भएको उनले बताए । यसले साना व्यवसायीलाई निकै राहत मिल्ने उनको भनाइ छ ।

रेमिट्यान्स रकम बैंक तथा वित्तीय संस्थाहरूमा जम्मा गरेमा न्यूनतम १ प्रतिशत बिन्दु थप ब्याज पाइने व्यवस्थाले तरलता बढाउन मद्दत गर्ने उनले बताए । महिला उद्यमीलाई दिइने कर्जा सिमा बढाएर २० लाख पु¥याइनु सकारात्मक रहेको भन्दै उनले सूक्ष्म निगरानीको व्यवस्थालाई तीन वर्ष बनाइनु पनि स्वागतयोग्य भएको बताए ।

“कालोसूचीको व्यवस्थालाई पुनरवलोकन गर्ने भनिएको छ । त्यो व्यवस्था व्यवसायीमैत्री हुनुपर्छ,” उनले भने । उनले सीसीडी अनुपात हटाएर कर्जा निक्षेप अनुपात ९० प्रतिशत बनाउनु सकारात्क रहेको भन्दै यसले पनि बजारमा तरलता बढाउने विश्वास व्यक्त गरे ।

उनले बैंक तथा वित्तीय संस्थाबाट लिने सेयर कर्जाको सीमा तोकिनुले भने सेयर बजारलाई असर पार्नसक्ने बताए । यस्तै, बजेटमा स्टार्टअपलाई २५ लाख सम्मको कर्जा दिइने भनिएको भएपनि त्यो विषय कार्यान्वयन गर्ने सन्दर्भमा मौद्रिक नीति प्रष्ट नभएको उनले बताए ।