विराटनगर । नेपाली कांग्रेस प्रदेश १ संसदीय दलका प्रमुख सचेतक केदार कार्किले प्रदेश सरकारका मन्त्रीहरू नै कमिसनको सेटिङमा लिप्त हुँदा सरकारप्रतिको विश्वास क्षिण हुँदै गएको आरोप लगाएका छन् । आइतबार नेपाल प्रेस युनियन ओखलढुंगाले आयोजना गरेको पत्रकार सम्मेलनमा कार्कीले प्रदेश सरकार तस्करहरूको घेराबन्दीबाट बाहिर निस्कनै नसकेको आरोप लगाएका हुन ।
उनले भने, “घेराबन्दीमा रहेर विकास निर्माण, कोभिड नियन्त्रण स्वास्थ्य सामग्री र औषधि खरिदमा ठूलो अनियमितता भएको छ । खोपको समानुपातिक वितरण हुन सकेको छैन । कात्रो किन्नसमेत सेटिङ मिलाएर कमिसनको चक्करमा लागेको देखिन्छ ।”
उनले प्रदेश १ आर्थिक, सामाजिक, भौगोलिक, पर्यटकीय, धार्मिक, जातीय तथा भाषिक हिसाबले देशकै एक नम्बरमा आउने सम्भावना बोकेको भएपनि सरकारको कार्यशैलीले सम्भावना कमजोर भएको बताए ।
सरकारमा रहेको दलभित्र एक समूहले अर्कोलाई पाखा लगाएर चलखेलमा विकाससँग सम्बन्धित ठेक्कापट्टा दिने गरेको बताउँदै उनले भने, “मुख्यमन्त्री जनताको सेवकभन्दा पनि शासक बन्न थालेकाले धेरै कार्यक्रम मुख्यमन्त्रीका नाममा ल्याइएको छ । आफूनिकटका कार्यकर्ताको भरपोषणमा केन्द्रित हुनेगरी आएका कार्यक्रमले जनताको जनजीविकामा फरक परेको छैन ।”
उनले प्रदेश सरकारको नीति तथा कार्यक्रम र बजेटसमेत भैँसीलाई एकमुठ्ठी चामल दिएर अघाउन लगाएको जस्तो भएको भन्दै टिप्पणी गरे ।
प्रदेश नम्त्रर १ का भौतिक पूर्वाधार मन्त्री आफ्नो वडामा अल्मलिएको भन्दै कार्कीले मन्त्रीले प्रदेशभित्र अरू जिल्ला र आफ्नै जिल्लामासमेत अन्य स्थानीय तह तथा वडाहरू छन् भन्ने हेक्का नराखेको पाइएको आरोप लगाए । “प्रदेशका मन्त्रीहरू आफ्नै वडाहरूमा अल्मलिने हो भने त्यस्ता मन्त्रीले सिङ्गो प्रदेशको नेतृत्व कसरी गर्छन् । विकास र बजेट आफ्नो वडामा खन्याउनेले प्रदेशको वृहत्तर विकासबारे सोच्न सक्लान ?,” उनले प्रश्न गर्दै भने ।
कार्कीले वडामात्र सीमित हुने मन्त्रीलाई वडाको अध्यक्ष भएर बस्न सुझाव दिए ।
अहिलेसम्म प्रदेशको नामाकरण गर्न नसकेको सरकारले प्रदेशका जनताको भावना बुझनु नसक्ने र एमालेभित्रकै आन्तरिक कलहलाई व्यवस्थापन गर्न नसक्दा बहुमतको प्रदेश सरकार केही समयभित्रै समाप्त हुने उनको दाबी छ ।
कांग्रेस राजनीतिबारे बोल्दै उनले भदौ १९ सम्ममा नेपाली कांग्रेसको चौधौँ महाधिवेशन अनिवार्य गर्नुपर्ने भएकाले लोकतन्त्र र पर्टीलाई सशक्त बनाउने नेतृत्वको खोजी भइरहेको बताए ।
