जनकपुरधाम । नेकपा एमालेका सांसद गोविन्द न्यौपानेले ट्याक्टर बाँडेर किसानको उत्पादन नबढ्ने टिप्पणी गरेका छन् । आइतबार प्रदेशसभामा भइरहेको नीति तथा कार्यक्रममाथिको छलफलमा सांसद न्यौपानेले सरकारले कार्यकर्ता पाल्ने योजना मात्रै ल्याएको भन्दै ट्याक्टर बाँडेर मात्रै किसानको उत्पादन बढ्छ भन्ने प्रश्न गरेका हुन् ।
सरकारले कार्यकर्तामुखी योजनालाई बढी प्राथमिकता दिने गरेको उनले बताए । “सरकारले ट्याक्टर र प्रान्तीय बस चलाएर समृद्धि हासिल ल्याउन खोजेको हो कि कमिसन खान खोजेको हो ?, “उनले भने, “तपाईंलाई थाहा छैन । काठमाडौं र बिहारमा साझा बस फेलियर भएको । निजी बससँग कसरी प्रतिस्पर्धा गर्न सक्छौँ ।”
प्रदेशको आवश्यकताको पहिचान गरेर योजना नल्याइएको भन्दै उनले कमिसन खाने हिसाबले योजना राखिएको दाबी गरे । नीति तथा कार्यक्रम कार्यन्व्यनमा पनि उनले शंका व्यक्त गरे ।
उनले किसानको लागि सिजन र ठाउँ अनुसारको योजना समेटन नसकेको भन्दै कृषिको खस्किदो अवस्थाले भोकमरी सिर्जना गर्नसक्नेतर्फ सचेत गराए ।
