काठमाडौं । सत्तारूढ नेपाल कम्युनिस्ट पार्टी (एमाले)का दोस्रो तहका नेताहरू संवादमा जुटेका छन् । प्रधानमन्त्री केपी शर्मा ओली र माधवकुमार नेपाल समूहका दोस्रो तहका नेताहरूबीच एक घण्टादेखि ललितपुरको समिट होटलमा वार्ता भइरहेको बताइएको छ ।
द्विपक्षीय वार्तामा अध्यक्ष ओलीका तर्फबाट कार्यदलका संयोजकसमेत रहेका सुवास नेम्वाङ, उपप्रधान तथा अर्थमन्त्री विष्णु पौडेल, प्रधानमन्त्रीका मुख्य राजनीतिक सल्लाहकार विष्णु रिमाल छन् । लुम्बिनी प्रदेशका मुख्यमन्त्री शंकर पोखरेलचाहिँ आजको छलफलमा छैनन् ।
झलनाथ खनाल र माधवकुमा नेपाल समूहका रहेका सुरेन्द्र पाण्डे, गोकर्ण विष्ट र घनश्याम भुसाल छलफलमा रहेको एक नेताले जानकारी दिए । आजको छलफलमा योगेश भट्टराई भने छैनन् । भीम आचार्य थपिएको एक नेताले बताए ।
“जेठ २ लाई नै आधार मानेर एकता गर्नेगरी दुई पक्षबीच छलफल चलिरहेको छ । हेरौँ, परिणाम कस्तो आउँछ, भत्काउने सक्रिय छँदै छन्,” ती नेताको भनाइ छ ।
सोमबार मात्रै खनाल–नेपाल समूहले कार्यदलको औचित्य सकिएको भन्दै एकताका लागि ६ बुँदे प्रस्ताव अघि सारेको थियो । र, कारबाही फिर्ताको शर्त अघि सारेको थियो । त्यस्तै उसले अहिले भइरहेका वार्ता, प्रधानमन्त्री ओलीले अघि सारेको एकता प्रस्ताव अल्मल्याउने चालबाजी भएको भन्दै भ्रममा नपर्न अपिल गरेको थियो ।
तथापि, दोस्रो तहका नेता संवादमा जुटेका हुन् ।
