काठमाडौं । नेकपा एमालेका खनाल–नेपाल समूहका प्रदेश–१ संयोजक भीम आचार्यले पार्टीलाई एकताबद्ध बनाउन दोस्रो पुस्तालाई हस्तान्तरण गर्नुपर्ने प्रस्ताव अघि सारेका छन् । उनले सोमबार सामाजिक सञ्जालमार्फत नेतृत्वले अभिभावकत्व ग्रहण गरी दोस्रो पुस्तालाई नेतृत्व दिनुपर्ने मध्यमार्गी प्रस्ताव अघि सारेका हुन् ।
“क.केपी ओली, क.झलनाथ खनाल, क.माधव नेपाल, क.वामदेव गौतम र क.अमृत बोहोराजस्ता प्रथम पुस्ताका नेताहरुले पार्टीको सम्मानित अविभावकत्व ग्रहण गरी नेतृत्व दोस्रो पुस्तालाई हस्तान्तरण गर्न,” उनको सुझाव छ ।
देशकै प्रमुख पार्टीभित्रको विवाद र संकटले लोकतन्त्र र क्रान्तिका सबै उपलब्धिहरु संकटमा परेको उनको निष्कर्ष छ ।
उनले ०७७ फागुन २३को सर्वोच्च अदालतको निर्णयपछि भएका सबै खाले गुटगत निर्णयहरु खारेज गरी महाधिवेशनले निर्वाचित गरेको केन्द्रीय कमिटी र निकायहरु तथा आफ्नो अधिवेशन या प्रकृयाबाट आएका जनसंगठन तथा मातहत कमिटीलाई स्थापित गर्नुपर्ने सुझाव पनि दिएका छन् ।
त्यस्तै नेताहरुले अहंकार त्यागेर एकताबद्ध हुनुपर्ने उनको सुझाव छ । “नेताहरुले अहंकार, घमण्ड, चरम महत्वकांक्षा, इष्र्या, लघुताभाष र इगो त्याग गरी पार्टीलाई एकतावद्ध बनाउँदै परिवर्तनकारी शक्तिको रुपमा अगाडि बढाउन सहयोग गर्ने,” उनले सुझावमा भनेका छन् ।
