काठमाडौं । निर्वाचन आयोगले जनता समाजवादी पार्टी (जसपा) का दुवै अध्यक्षलाई पत्र पठाएको छ । आज आयोगले जसपाका अध्यक्ष महन्थ ठाकुर र उपेन्द्र यादवलाई कानुन अनुसार आउन पत्राचार गरेको हो ।
“एकपक्षले अर्को पक्षका केहीलाई हटाएको भनेर दुवै पक्षले अध्यावधिक गर्न पत्र पठाउनुभयो । उहाँहरुले पार्टीको लेटरप्याडमा पत्र पठाउनुभएको छ । त्यो कानुनत: नियमावली अनुसार भएन। राजनीतिक दलसम्बन्धी दफा ५१ र नियमावली ७४ को नियम २५ ले अध्यावधिक गर्नेहुँदा अनुसूची १८ को ढाँचा बमोजिम अध्याधिकका लागि दाबी पेश गर्नुपर्ने हो । त्यसो नभएकाले सोही बमोजिम आउनु भनेर दुवै अध्यक्षलाई पत्राचार गरिएको छ,” आयोगका एक अधिकारीले भने ।
जसपाका अध्यक्ष ठाकुर पक्षले मंगलबार अर्का अध्यक्ष यादवलाई पार्टीको सधारण सदस्यबाट हटाएको थियो । लगत्तै उसले यादवको नाम दर्ता किताबबाट निकालिदिन पत्राचार गरेको थियो ।
त्यस्तै यादव पक्षले ठाकुरसहित नेताहरू राजेन्द्र महतो, लक्ष्मणलाल कर्ण र सवेन्द्रनाथ शुक्ललाई कारबाही गरेर आयोगलाई कमिटी अध्यावधिक गर्न पत्राचार गरेको थियो ।
सोही निवेदनपछि आयोगले दुवै पक्षलाई कानुन अनुसार आउन भनेको हो । दुवै पक्ष कानुन अनुसार आएपछि मात्रै थप प्रक्रिया अघि बढ्ने ती अधिकारी बताउँछन् ।
