विराटनगर । प्रदेश नम्बर–१ मा मन्त्री र पहुँचवालाको सिफारिसमा आफूनिकटलाई कोरोनाविरुद्धको खोप लगाएको विषयप्रति मुख्यमन्त्री शेरधन राईको सचिवालयले स्पष्टीकरण दिएको छ ।

मुख्यमन्त्री राईको निजी सचिवालयले प्रदेश–१ का सबै नागरिकका लागि खोप लगाउन संघीय सरकारसँग समन्वय गर्दै खोप खरिदबारे परामर्श गरिरहेको जनाएको छ ।

केही दिनयता सामाजिक विकासमन्त्री उषाकला राईको सिफारिसमा पार्टीका सीमित कार्यकर्ता, कर्मचारी र व्यापारीलाई कोभिसिल्डको दोस्रो डोज खोप सुटुक्क लगाएको विषयमा नागरिकस्तरबाटै आलोचना र टिप्पणी भइरहेको छ । सिनेमा हलमा खोप लगाएपछि त्यहाँ अवरोध गर्दै सर्वसाधारणले विरोध गरेका थिए ।

यस घटनामा मुख्यमन्त्री कार्यालयको संलग्नता नरहेको जनाउँदै राईका प्रेस सल्लाहकार ध्रुव सुवेदीले विराटनगरमा खोपको विषयलाई लिएर केही सञ्चारमाध्यममा आएको समाचारप्रति गम्भीर ध्यानाकर्षण भएको जनाएका छन् । मुख्यमन्त्री निवासमा खोप लगाउने योजना र मुख्यमन्त्री कार्यालयमा खोप लगाउने कार्यक्रम राखिएको भन्ने गलत भएको दाबी गर्दै उनले भनेका छन्, “मुख्यमन्त्रीको सचिवालयको दबाबमा खोप लगाएको भन्नेजस्ता अनर्गल एवम् प्रायोजित रुपबाट गरिएको प्रचार र लेखिएका समाचारहरुप्रति खेद प्रकट गर्दै त्यस्ता भ्रमपूर्ण र प्रायोजित समाचारहरुको हामी खण्डन गर्दछौँ ।”

पहिलो डोज खोप लगाएका सबैलाई प्रोटोकलानुसार मौज्दात खोपबाट दोस्रो डोजको खोप लगाउँदै थप खोपको व्यवस्था गर्न र बाँकी सबै नागरिकका लागि खोपको शीघ्र व्यवस्था गर्न अहोरात्र मुख्यमन्त्री राई जुटिरहेको सुवेदीले प्रकासित गरेको विज्ञप्तिमा उल्लेख छ ।

प्रदेश सरकार प्रदेशका नागरिकलाई कोभिड–१९ को भाइरसबाट बचाउन, त्यसको रोकथाम, नियन्त्रण र उपचारमा सबै उपाय, स्रोत र सामर्थ्य जुटाएर अहोरात्र सक्रिय रहेको पनि विज्ञप्तिमा जनाइएको छ । प्रदेशका सबै नागरिकका लागि खोप लगाउन संघीय सरकारसँग समन्वय गर्दै खोप खरिदबारे पनि परामर्श गरिरहेको जनाइएको छ ।