ब्रसेल्स । युरोपेली संघ (ईयू)ले थोरै तथा मध्यम आय भएका मुलुकहरुका लागि १० करोड डोज खोप उपलब्ध गराउने भएको छ ।

कोरोनाभाइरसको महामारीमा परेका ती देशहरुलाई महामारीविरुद्ध लड्न सघाउने गरी कोरोनाभाइरसविरुद्धको खोप संघले दिने भएको हो ।

युरोपेली आयोगका अध्यक्ष उर्सुला भोन डेर लेयेनले सो खोप ती देशहरुलाई यस वर्षको अन्त्यसम्ममा उपलब्ध गराइने निर्णय भएको शुक्रबार जानकारी दिए । विश्व स्वास्थ्य सम्मेलनलाई सम्बोधन गर्दै उनले यो प्रारम्भिक सहयोग मात्रै हुने र थप सहयोग पनि गर्न सकिने बताए ।

कोरोनाभाइरसको महामारी विश्वभरि नै फैलिएकाले संघले विश्वभरिका धेरै देशहरुलाई सहयोग गर्नुपरेको पनि उनले जानकारी दिए । रासस/एएनआई