काठमाडौं । प्रधानमन्त्री केपी शर्मा ओलीले विश्वासको मत लिने निर्णय गरेपछि सबैभन्दा लोकतन्त्रान्त्रिक शैलीमा जनता समाजवादी पार्टी (जसपा)को निर्णय आएको छ ।
तटस्थ बस्ने वा विपक्षमा मतदान गर्ने अधिकार सांसदहरुको स्वविवेकमा छोड्ने निर्णय गरेको जसपाको अभ्यासमा भने त्यस्तो अवस्था छैन । विपक्षमा मतदान गर्नेको संख्या बढाउन उपेन्द्र यादवसहित उनको पक्ष कसरत गरिरहेको छ । तटस्थ मतदानका पक्षमा रहेका महन्थ ठाकुरले भने पार्टी कार्यालय बबरमहलमा जम्मा भएर संसद् बैठकमा जाने तयारी गरेका छन् ।
यादव पक्षले २० बढी मत विपक्षमा दिने वचन अन्य पार्टीका नेताहरुलाई दिएको छ भने ठाकुर पक्षले आफ्नो पक्षमा भएका २२ सांसद तटस्थ बस्ने दाबी गरेको छ । त्यसैले यादवले भने कम्तीमा पनि आफ्नो पक्षका अर्थात १७ सांसदलाई विपक्षमा मतदान गराउन मिहिनेत गरिरहेका छन् ।
“हामी तटस्थ मतदानका पक्षमा भएकाहरु ढुक्क छौँ, हाम्रा पक्षमा रहेका २२ सांसद तटस्थ रहनुहुनेछ,” ठाकुर पक्षका एक नेताले भने, “उपेन्द्र–बाबुरामजीहरुले २० भन्दा बढी सांसदले विपक्षमा मतदान गर्छन् भन्नुभएको रहेछ । हेरौँ, उहाँहरुले भनेको कुरा कति पूरा गर्न सक्नुहुन्छ ।”
उनले अहिले तटस्थ बस्नु नै जसपाका लागि सबैभन्दा उपयुक्त भए पनि त्यसलाई यादव–भट्टराई समूहले अस्वीकार गरिरहेको बताए ।