काठमाडौं । चामल, दालजस्ता दैनिक उपभोग्य वस्तु तीन महिनाको लागि स्टक रहेको वाणिज्य, आपूर्ति तथा उपभोक्ता संरक्षण विभागले जनाएको छ ।
वाणिज्य, आपूर्ति तथा उपभोक्ता संरक्षण विभागका महानिर्देशक प्रकाश पौडेलले चामल, दाल, नुन, तेल, चिनीलगायत दैनिक उपभोग्यवस्तुहरु पूर्ण रुपमा ‘लकडाउन’ भएको अवस्थामा पनि तीन महिनालाई पुग्ने गरी बजारमा स्टक रहेको बताए । उपभोग्य खाद्यवस्तुको आपूर्ति सहज रुपमा भइरहेको उनको भनाइ छ ।
महानिर्देशक पौडेलले बजारमा खाद्यवस्तुको उपलब्धता सहज रुपमा हुने भन्दै उपभोक्तालाई आवश्यकताभन्दा बढी खरिद गरी सञ्चय नगर्न पनि आग्रह गरे । “चामल, दाल, नुन, तेल, चिनीलगायत न्यूनतम वस्तुको स्टक करिब तीन महिनालाई अझै पनि हामीलाई सप्लाइमा समस्या छैन । नआए पनि पुग्छ । खाद्यपदार्थको आपूर्ति सहज छ । उपभोक्ताले उपभोगको मात्रा बढाए, आवश्यकताभन्दा बढी खरिद गरिदिनुभो भने मूल्यवृद्धि गर्ने सम्भावना रहन्छ । आत्तिनुपर्ने अवस्था छैन,” उनले भने ।
दैनिक उपभोग्य वस्तुको अस्वाभाविक मूल्यवृद्धि भएको खन्डमा मूल्यवृद्धि गराउनेलाई कारबाही गरिने उनले बताए । बजारको अवस्थाको सम्बन्धमा विभागले दैनिक रुपमा अनुगमन गरिरहेको उनी बताउँछन् ।
उनले दैनिक उपभोग्य वस्तुको आयातमा कुनै पनि प्रकारको समस्या नभएको जानकारी दिए । दैनिक उपभोग्य वस्तुहरु, मास्क, स्यनिटाइजरजस्ता अत्यावश्यक वस्तुहरु सहज रुपमा नाकाबाट आयात भइरहेको उनको भनाइ छ ।
उपभोक्ता अधिकारकर्मी माधव तिमिल्सिनाले बजारमा आपूर्तिको समस्या नभए पनि केही दैनिक उपभोग्य वस्तुहरुको अस्वाभाविक रुपमा मूल्यवृद्धि भइरहेको बताए । विभागले बजार अनुगमन गरी कालोबजारी गर्नेलाई कडा कारबाही गर्नुपर्ने उनको माग छ ।