काठमाडौं । नेपाली कांग्रेसका नेता प्रकाशमान सिंहले सरकारले प्रेस स्वतन्त्रतामाथि अङ्कुश लगाउने प्रयास गरिरहेको भन्दै सबै मिलेर प्रतिवाद गर्नुपर्ने बताएका छन् । नेपाल प्रेस युनियन काठमाडौं शाखाले सोमबार पत्रकार महासंघमा नवनिर्वाचितहरूलाई सम्मान गर्न आयोजना गरेको कार्यक्रममा बोल्दै उनले यस्तो बताएका हुन् ।
नेपालका पत्रकारहरू सँधै प्रतिगमन र असंवैधानिक कदमका विरुद्धमा उभिएको भन्दै उनले प्रसंशा पनि गरे । सूचना प्रविधि विधेयकलगायतका प्रेससँग जोडिएका विधेयकहरू ल्याउँदा सरकारले प्रेस तथा अभिव्यक्ति स्वतन्त्रता कुण्ठित गर्ने गरि ल्याएको पनि उनले बताए । “केपी ओली नेतृत्वको सरकारले प्रेस स्वतन्त्रतामाथि अङ्कुश लगाउने प्रयास गरिरहेको छ । सबै मिलेर प्रतिवाद गर्नुपर्छ,” उनले भने ।
पत्रकारहरूले वास्तविक, निष्पक्ष ढङ्गले कलम चलाई देश र जनाताको पक्षमा काम गर्न र कसैको डर धम्कीसँग नडराई निष्पक्ष ढङ्गले पत्रकारिता गर्न पनि उनले आग्रह गरे ।
त्यस्तै, कार्यक्रममा पूर्व अर्थराज्यमन्त्री, कांग्रेस नेता उदयशमशेर राणाले नेपालको पत्रकारिता सँधै लोकतन्त्रको पक्षमा उभिने गरेको भन्दै प्रेसले खेलेको भूमिका सराहनीय भएको बताए । “हिजो राजाको प्रतिगमनविरुद्ध उभिएको नेपालको प्रेस अहिलेको सरकारको प्रतिगमनविरुद्ध पनि उभिएको छ,” उनले भने । अन्य देशहरूमा निश्चित अवधिमा मिडियाहरू एजेण्डाबाट बाहिरिने गरेपनि प्रतिगमनको विपक्षमा नेपालको प्रेस सँधै अडिग रहेको भन्दै उनले पत्रकार महासंघको नवनिर्वाचित समितिलाई शुभकामना दिए ।
पत्रकार महासंघका अध्यक्ष बिपुल पोखरेलले सरकारको प्रेस बिरोधी कदमविरुद्ध महासंघ कडा रूपमा प्रस्तुत हुने बताए ।
कार्यक्रममा पत्रकार महा
संघ केन्द्र, उपत्यका, प्रतिष्ठान, एसोसियट प्रदेश र काठमाडौं, भक्तपुर र ललितपुरबाट निर्वाचितहरूलाई सम्मान गरिएको थियो ।
