काठमाडौं । वाग्मती प्रदेशको सर्वदलीय बैठकमा प्रदेशसभाको अबरुद्ध बैठक सुरु गर्ने, कोभिड १९ र नीति तथा कार्यक्रमका विषयमा छलफल भएको छ । सोमबार भएको बैठक यी तीन विषयमा केन्द्रित रहेको भौतिक पूर्वाधार विकासमन्त्री रामेश्वर फुयालले जानकारी दिए ।
“बैठकमा प्रदेशसभाको अवरुद्ध बैठक र प्रदेशसभालाई व्यवस्थित कसरी गर्ने, कोभिड–१९ को नियन्त्रण र रोकथाममा हालसम्म गरेका काम र अब कसरी बढ्ने ?, महामारीलाई पराजित गर्न स्थानीय तह, प्रदेश र संघले कसरी समन्वय गर्ने ? र नीति तथा कार्यक्रममा विषयमा छलफल भयो,” उनले भने ।
बैठकमा आर्थिक वर्ष २०७७/७८ को नीति तथा कार्यक्रमबारे दलहरुको सुझाव माग गरेको उनले बताए । त्यस्तै बैठकमा विद्युतीय यातायातका विषयमा पनि छलफल भएको उनले जानकारी दिए ।
“विद्युतीय प्रणालीको यातायात व्यस्थापनका लागि यातायात प्रणालीमा सुधार ल्याउनुपर्छ । डिजिटल वाग्मती प्रदेशको अभियान छ । हरित वाग्मती प्रदेश अभियानमा छौं । यसका लागि खनिज पदार्थबाट चल्ने साधनलाई नियन्त्रण र विद्युतीय साधनको प्रयोगलाई बढावा दिन गइरहेका छौँ” बैठकमा भएको छलफलबारे उनले भने ।
यसले आफ्नै उत्पादनको प्रयोग हुने र रकम सञ्चिति हुने उनले बताए ।
मन्त्री फुँयालले त्यसका लागि कानुन पनि बनाएर व्यवस्थापनका लागि बोर्ड बनाइएको र सार्वजनिक बस खरिद प्रक्रिया टेण्डरमा रहेको उनले बताए । बैठकमा मुख्यमन्त्री डोरमणी पौडेलले प्रणालीको सुधारको पक्षमा रहेको बताएका थिए ।
त्यस्तै बैठकमा कोभिड १९ को व्यवस्थापनबारे मुख्यमन्त्रीले भने, “कोभिड १९ का लागि हामीले ध्यान दिएका छौँ । काठमाडौंमा त केन्द्र सरकारकाले पनि गरिरहेको छ । १० जिल्लामा थप व्यवस्थापन गरेका छौं । १३ वटा अस्पताल पनि छन् । भेन्टिलेरसहितको सुविधा गरेका छौं ।”
बैठकमा मन्त्रीहरुसहित माओवादी केन्द्रका नेताहरु भने बाहिरी जिल्लामा रहेकोले सहभागी नभएको र नेकपा एमाले, नेमकिपा र राप्रपाका नेताहरुको सहभागि भएको मन्त्री फुयालले बताए ।
