काठमाडौं । ज्योति लाइफ इन्स्योरेन्सको धितोपत्रको प्रारम्भिक सार्वजनिक निष्कासन (आईपीओ) बाँडफाँड भएको छ । बिक्री प्रबन्धक एनएमबी क्यापिटलले कम्पनीको आईपीओ आज बाँडफाड गरेको हो ।
कम्पनीले कुल योग्य आवेदक मध्ये धितोपत्र निष्कासन बाँडफाँड नियमावली २०७४ अनुसार गोलाप्रथाबाट ५ लाख ९४ हजार आवेदकलाई १० कित्ताको दरले सेयर बाँडफाड भएको छ ।
कम्पनीको आईपीओमा कुल १८ लाख ४२ हजार ४८० आवेदकको आवेदन परेको थियो । जसमध्ये बैंक खातामा समस्या अथवा विविध कारणले बैंकहरुबाट सीडीएससीको सिस्टममा जानु पूर्व ४१ हजार ७०३ वटा आवेदन रद्ध भएको छ । यस्तै आवेदन भेरीफाइको क्रममा दुई वा दुईभन्दा बढी आवेदन दिने यस्तै दोहोरो आवेदन परेको २ हजार ९२२ आवेदन रद्ध भएको बिक्री प्रबन्धकले जनाएका छ । जसमध्ये १७ लाख ९७ हजार ३५ योग्य आवेदकबाट ३ करोड ५ लाख ९९ हजार ३६० कित्ता सेयर माग भएको हो ।
सोही योग्य आवेदक मध्ये ५ लाख ९४ हजार आवेदकले गोलाप्रथाबाट १० कित्ता सेयर पाउँदा बाँकी रहेका १२ लाख ३ हजार ८३५ आवेदकको हात खालि भएको छ ।
कम्पनीले गएको फागुन २१ गतेदेखि प्रतिकित्ता १०० रुपैयाँ अंकित मूल्यमा ६६ करोड रुपैयाँ बराबरको ६६ लाख कित्ता सेयर सर्वसाधारणका लागि बिक्री खुला गरेको थियो । जसमध्ये ५ प्रतिशत अर्थात् तीन लाख ३० हजार सामुहिक लगानी कोषका लागि र ५ प्रतिशत अर्थात तीन लाख ३० हजार कित्ता नै कर्मचारीका लागि सुरक्षित गरेर बाँकी रहेको ५९ लाख ४० हजार कित्ताका सर्वसाधारणको लागि बिक्री खुला गरेको थियो ।
लगानीकर्ताले आईपीओ रिजल्ट आईपीओ निष्काशन गर्ने सम्बद्ध कम्पनी ज्योति लाइफ इन्स्योरेन्सको वेवसाइट, सिडिएस एण्ड क्लियरिङको मेरो शेयर मोबाइल एप र बिक्री प्रबन्धक एनएमबी क्यापिटलको वेबसाइटबाट मात्र हेर्न सक्नेछन् । आईपीओ रिजल्ट डट सीडीएससीडटकमडटएनपी पोर्टलमा पनि आईपीओ रिजल्ट हेर्न सकिनेछ ।
हाल एक अर्ब ५४ करोड रुपैयाँ चुक्ता पुँजी रहेको कम्पनीको आईपीओ निष्कासनपछि चुक्ता पुँजी दुई अर्ब २० करोड रुपैयाँ पुग्नेछ । आईपीओ निष्कासनपछि कम्पनीको संस्थापक र सर्वसाधारण सेयर हिस्सा ७०ः३० प्रतिशत हुनेछ ।