काठमाडौं । प्रस्तावित बिमा प्राधिकरण ऐन विधयेकमा बिमा कम्पनीको सञ्चालकलाई उमेर हद तोक्ने तयारी भएको छ ।
प्रधिनिधि सभा अन्तर्गतको अर्थ समितिमा छलफलमा रहेको बिमा विधयेकमा बिमा कम्पनीको सञ्चालकलाई उमेरहद तोक्नुपर्ने विषयले प्रवेश पाएको हो ।
विधेयकको दफा ४९ मा सञ्चालकको कार्यकाल ४ वर्ष र उक्त सञ्चालक पुनः नियुक्त अथवा मनोनीत हुन सक्नेछ भन्ने उल्लेख रहेको छ ।
तर संसदीय समितिमा छलफलको क्रममा त्यसलाई परिमार्जन गर्दै कुनै पनि सञ्चालक लगातार दुई कार्यकालभन्दा बढी एउटै कम्पनीको सञ्चालक हुन नपाउने र चारवर्ष बाहिर रहेर पुनः सोही कम्पनीको सञ्चालक हुन पाउने व्यवस्था गर्नुपर्ने व्यवस्था गर्न खोजिएको छ ।
राजश्व सचिव रामशरण पुडासैनीले सोही दफामा बिमा कम्पनीका सञ्चालकलाई ४० वर्षको उमर हद राख्नुपर्ने प्रस्ताव गरेका थिए ।
उक्त प्रस्ताव आएपछि समितिका सभापति कृष्णप्रसाद दाहालले ६५ वर्ष उमेर हद राख्ने विषयमा थप छलपल आवश्यक रहेको बताएका हुन् ।
पुडासैनीले अर्थ मन्त्रालय अन्तरगतका अन्य संस्थामा पनि ६५ वर्षको उमेर हद राख्न लागिएको र वाफियामा पनि उक्त प्रस्ताव राखिएकोले बिमा ऐनमा पनि राख्नुपर्नेमा जोड दिए ।
सभापति दाहालले लगानी गर्नेलाई सञ्चालक नबन्नू भनेर कसरी भन्ने ? भनी गरेको प्रश्नमा सचिव पुडासैनीले बिमा कम्पनी पब्लिक कम्पनी भएकोले एउटै व्यक्ति सञ्चालक हुनुपर्छ भन्ने नभएको जवाफ दिए ।
बिमा ऐनमा नै स्वतन्त्र सञ्चालक भने कम्पनीको अध्यक्ष बन्न नपाउने व्यवस्था आउने भएको छ ।
यस्तै बिमा कम्पनीले सार्वजनिक निष्कासन गर्दा अनिवार्य रुपमा ५ प्रतिशत सेयर कर्मचारीलाई छुट्याउनुपर्ने प्रस्तावित विधेयकमा अब त्यसलाई अनिवार्य नगर्ने तर अधिकतम ५ प्रतिशतसम्म कर्मचारीलाई छुट्याउन सक्ने भएका छन् ।
यस्तै सार्वजनिक निस्कासन गर्दा कम्तिमा एकवर्ष व्यवसाय सञ्चालन गरेको लेखा परीक्षण भएको ब्यालेन्ससिट आवश्यक पर्ने व्यवस्था ऐनमा नै आउने भएको छ ।
यस्तै बिमा कम्पनीको सञ्चालक हुन सरकारी वा संगठित संस्थामा ३ वर्षको कार्यअनुभव चाहिनेछ । बिमकको सञ्चालक सम्पत्ति शुद्धीकरण कसुरमा कसुरदार ठहर भएका व्यक्ति पनि सञ्चालक बन्न पाउने छैनन् ।
यस्तै बिमा कम्पनीको प्रमुख कार्यकारी अधिकृत हुन तोकिएको शैक्षिक योग्यताको साथै व्यवस्थापकीय तहमा बिमा क्षेत्रमा भए ४ वर्ष, बिमा र बैंकिङमा भएर ७ वर्ष र बैंकमा मात्रै भए ८ वर्षको अनुभव हासिल भएको हुनपर्ने ऐनले व्यवस्था गर्नेछ ।
