इस्लामावाद । पाकिस्तानी प्रधानमन्त्री इमरान खानलाई शनिबार कोभिड–१९ संक्रमण पुष्टि भएको पाकिस्तानी अधिकारीहरूले पुष्टि गरेका छन् ।
पाकिस्तानी सूचनामन्त्री शिब्ली फराजले जियो न्युज टेलिभिजनसँगको कुराकानीमा प्रधानमन्त्री खान खोप लगाउनुभन्दा पहिले नै सार्वजनिक कार्यक्रमहरूमा सक्रिय रहेकाले त्यही समय संक्रमण सरेको हुनसक्ने बताएका छन् ।
कोभिड–१९ विरूद्धको पहिलो खोप लगाएको ठिक दुई दिनपछि उनलाई संक्रमण भएको पुष्टि गरिएको छ । ६८ वर्षीय प्रसिद्ध पूर्वक्रिकेट खेलाडीसमेत रहेका प्रधानमन्त्री खानले बिहीबार चीनमा विकास गरिएको सिनोफार्म खोप लगाएका थिए ।
पाकिस्तानी प्रधानमन्त्रीको कार्यालयले एक विज्ञप्ति जारी गरी भनेको छ, “अहिले हामी यति मात्र भन्न सक्छौँ कि प्रधानमन्त्री खानलाई संक्रमण पुष्टि भएको छ र उहाँले आफूलाई अन्य व्यक्तिको सम्पर्कबाट टाढा राख्नुभएको छ ।”
प्रधानमन्त्री खानलाई शनिबार हल्का खोकी र हल्का ज्वरो आएको पुष्टि उनका प्रवक्ता सहबाज गिलले गर्दै उनको शनिबार नै परीक्षण हुँदा कोभिड–१९ संक्रमण पुष्टि भएको हो । प्रधानमन्त्रीलाई संक्रमण पुष्टि भएपछि विगत केही दिनमा उनको निकट पुगेका व्यक्तिहरूलाई सावधानी अपनाउन भनिएको छ ।
यसैबीच, प्रवक्ता गिलले भने, “संक्रमण पुष्टि हुनुलाई खोपसँग जोडेर नहेरिदिनोस् । खोप लगाएको केही हप्तापछि मात्र शरीरमा कोभिडविरूद्धको प्रतिरक्षा प्रणाली विकास हुने हो । तपाईंको मान्यजनहरू तथा प्रियजनलाई खोप लगाउने सुनिश्चित गराउनुहोस् । सचेत रहनुहोस् ।”
पाकिस्तानमा शनिबारसम्ममा छ लाख २० हजार संक्रमित रहेको सरकारी तथ्यांक रहेको छ भने यहाँ कोभिड–१९ संक्रमित १३ हजार ८०० भन्दा बढी व्यक्तिको मृत्यु भइसकेको छ ।
पाकिस्तानले चीनबाट सहयोगप्राप्त १० लाख खोपलाई प्रथमिकताका आधारमा स्वास्थ्यकर्मी तथा अग्रपंक्तिमा खटिने कर्मचारी, पत्रकारलगायतका जोखिममा रहेका व्यक्तिहरूलाई दिन सुरू गरिसकेको छ । रासस/एएफपी