पर्वत । पर्वतमा अहिले चुनावी माहोल छ । यो उद्योग वाणिज्य संघको १७ औँ अधिवेशन हो । प्रदेश तथा प्रतिनिधि सभा निर्वाचनपछिको सबैभन्दा ठूलो चुनाव भएका कारण पनि उवासंघको शनिबार हुने चुनावले जिल्ला नै तातेको छ ।
चुनाव उद्योगी तथा व्यवसायीको संस्थाको भएता पनि प्रष्टरुपमै राजनीतिक दल संलग्न छन् । शनिबार हुने चुनावमा कांग्रेस समर्थित लोकतान्त्रिक प्यानलबाट शिव शर्मा पौडेलको दाबेदारी रहेको छ ।
अर्कातर्फ वामपन्थी दलको समर्थनमा गोपी अधिकारी चुनावमा होमिएका छन् ।
अधिकारी समूहले आफूहरुलाई साझा, स्वतन्त्र, समावेशी र व्यवसायिक समूहले रहेको प्रचार गर्दै आएको छ ।
अधिकारी माओवादी केन्द्र निकटका व्यवसायी हुन् ।
केन्द्रीय राजनीतिमा एमालेभित्रै दुई गुटको समानान्तर अभ्यास हुँदा यहाँको चुनावमा भने एमालेका उमेदवार छैनन् ।
ब्युँतिएको एमालेका अध्यक्ष तथा प्रतिनिधि सभा सदस्य पदम गिरी पनि माओवादी केन्द्रका उमेदवारसहितको प्यानल घोषणा कार्यक्रममा सहभागी भएका थिए ।
राजनीतिक छवि बाहेक यहाँ हुने व्यवसायीको चुनावमा दुवैपक्षका उमेदवारहरुले आ–आफ्ना एजेन्डा अगाडि सारेका छन् ।
शिव शर्मा पौडेल प्यानलले डिजिटल मार्केटिङलाई जोड दिएको छ भने अधिकारी समूहले कास्कीको नयाँपुलदेखि हेम्जा सुरुङमार्गको सम्भाव्यता अध्ययन भइरहेको सन्दर्भमा त्यसलाई अभियान स्वरुप सहकार्य गर्ने बताएको छ ।
एक लाख रुपैयाँ सीड मनि दिएर उपशाखा विस्तार गर्ने एजेन्डा लिएर अधिकारी समूह मतदातासमक्ष पुगेको छ ।
पौडेल समूहले चाहिँ बाँकी रहेका स्थानीय तहमा उपशाखा खोल्ने, पान भ्याटको तालिमदेखि पर्यटकीय प्याकेज, खेलमैदान देखि सिटीहल निर्माण, लप्सी, अदुवा कफीको अन्तर्राष्ट्रिय बजारीकरण गर्ने एजेन्डा तय गरेको छ ।
यी एजेन्डा तीन महिनाभित्रै पूरा गर्ने अध्यक्षका दाबेदार पौडेलले बताए ।
उवासंघको कोष बढाएर पाँच करोड पुर्याउने, प्रत्येक उपशाखालाई २० लाखको कोष बनाउने र ब्याज रकम व्यवसायीको हकहितमा खर्च गर्ने यो समूहको योजना छ ।
अधिकारी समूहले चाहिँ कुश्मामा कालिका मन्दिर बनाउने, पर्वतलाई व्यापारिक हब बनाउने एजेन्डा अगाडि सारेको छ ।
यी एजेन्डामध्ये मतदाताले कसलाई पत्याउँछन त्यो भने शनिबारको निर्वाचनले नै बताउनेछ ।
कुल २२९३ मतदाता रहेको निर्वाचनमा अध्यक्ष र २२ सदस्यहरु चुनिनेछन् ।
