काठमाडौं । नेपाल कम्युनिस्ट पार्टी (नेकपा) ओली समूहका स्थायी कमिटी सदस्य सुवास नेम्वाङले आफूलाई कारबाही गर्ने कुरा हास्यास्पद भएको प्रतिक्रिया दिएका छन् ।
नेकपाको अर्को समूह, दाहाल–नेपाल पक्षले नेकपाका नेम्वाङलाई तीन दिनभित्र संसदीय दलको उपनेताबाट राजीनामा दिन निर्देशन दिँदै पार्टी स्थायी कमिटीबाट ६ महिनालाई निलम्बन गरेको थियो । कारबाहीको मिति गुज्रिएपछि पार्टी हितअनुकूल काम गर्न पनि निर्देश गरेको थियो ।
बाह्रखरीसँग कुराकानी गर्दै नेम्वाङले आधिकारिक नेकपाको कुनै बैठक नरहेको र आफूलाई कारबाही गर्न पनि नसक्ने जानकारी दिए । “निर्वाचन आयोगले आधिकारिक भनेको, केपी शर्मा ओली प्रथम अध्यक्ष, पुष्पकमल दाहाल प्रचण्ड द्वितीय अध्यक्ष रहेको नेकपाको कुनै बैठक छैन । बैठक महासचिवले बोलाउने स्पष्ट प्रावधान छ । उहाँले बैठक भनेर खबर पनि गर्नुभएको छैन । कसले कहाँ बसेर के निर्णय ग¥यो त्यो मैले थाहा पाउने कुरा भएन,” उनले बाह्रखरीसँग भने ।
कारबाहीको विषयबारे कसैले जानकारी नगराएको र सोधीखोजी पनि नगरेको उनको भनाइ थियो । पुस ५ गतेपछाडि नेकपामा एउटाले अर्को पक्षलाई कारबाही गर्ने स्पर्धा नै चलेको छ । पुस ५ गते दाहाल–नेपाल समूहले ओलीलाई पार्टी अध्यक्षबाट अनुशासनको कारबाही गर्ने र अनुमोदनका लागि केन्द्रीय कमिटीमा लैजाने निर्णय गरेको थियो । पुस ७ गते बसेको तेस्रो केन्द्रीय कमिटीको बैठकले ओलीलाई अध्यक्षबाट हटाएको थियो । ९ गते सकिएको केन्द्रीय कमिटी बैठकले ओलीलाई हटाएर माधवकुमार नेपाललाई समान हैसियतको अध्यक्ष चयन गरेको थियो ।
त्यसपछि दाहाल–नेपाल समूहले ओलीलाई साधारण सदस्य समेत नरहनेगरी कारबाही गरेका थिए । र, पार्टी महासचिवबाट विष्णु पौडेललाई हटाएका थिए ।
यता ओली समूहले दाहाललाई दिएको कार्यकारी अध्यक्षको अधिकार खोस्दै पार्टी प्रवक्ताबाट नारायणकाजी श्रेष्ठलाई हटाएको थियो ।
दाहाल–नेपाल समूहको संसदीय दलको बैठकले ओलीलाई नेताबाट हटाएर प्रचण्ड नियुक्त गरेको थियो । ओलीले केही दिनअघिमात्रै संसदीय दलको मुख्य सचेतकबाट देव गुरूङलाई हटाएर विशाल भट्टराई नियुक्त गरेका थिए ।
आज पुनः दाहाल–नेपाल पक्षले केन्द्रीय कमिटीबाट ओलीलाई दलको नेताबाट हटाएको निर्णय अनुमोदन गर्दै स्थायी कमिटीबाट नेम्वाङ, केन्द्रीय सदस्यबाट विशाल भट्टराई, प्रभु साह, कर्ण थापा, महेश बस्नेत, सूर्य थापा, शान्ता चौधरीलाई ६ महिना निलम्बन गर्ने निर्णय गरेको छ ।
